BAKI,VOA, Nailə Babazadə

İsrailin "Kanal 12" televiziyasının yaydığı məlumata görə, rəsmi Vaşinqton və Tel-Əviv İranla aparılan danışıqların razılaşma ilə bitməməsi ehtimalına qarşı hərbi əməkdaşlığı intensivləşdiriblər.

VOA xəbər verir ki, ABŞ-ın Yaxın Şərqə hərbi qüvvə toplamağa davam etdiyi və bunun gələcək hərbi əməliyyatlara zəmin hazırlamaq məqsədi daşıdığı iddia edilir.

İsrailin yüksək rütbəli rəsmiləri bildirirlər ki, hərbi hazırlıqlar davam etsə də, hücumların xarakteri ilə bağlı tərəflər arasında fikir ayrılığı mövcuddur. İsrail İranın mühüm infrastruktur obyektlərinə birbaşa zərbələr endirilməsinin tərəfdarı olsa da, ABŞ rəhbərliyinin hələlik buna ehtiyatla yanaşdığı qeyd olunur. İsrail tərəfi ABŞ-ın bu addımlarını ya regionda yeni bir "qələbə imici" yaratmaq, ya da strateji güc balansını kökündən dəyişmək istəyi kimi qiymətləndirir.

İran tərəfi isə ABŞ-ın diplomatik danışıqlarda səmimiyyətini sual altına qoyaraq Vaşinqtona etibar etmədiyini bildirib. Məhz bu səbəbdən Tehranın hələ də ABŞ-ın tələblərinə rəsmi cavab vermədiyi vurğulanır. Məlumata görə, İran mövcud vəziyyətdə Körfəz ölkələri ilə yanaşı, Rusiya və Çini də prosesə cəlb edərək öz mövqeyini gücləndirməyə çalışır.