BAKI,VOA
Dünya Bankı "Xəzər dənizinin ekosisteminin bərpası: çirklənmənin idarə olunması və bioloji müxtəlifliyin qorunması sahəsində potensialın yaradılması" adlı genişmiqyaslı ekoloji təşəbbüsün maliyyələşdirilməsini təsdiqləyib.
VOA bu barədə banka istinadən xəbər verir.
Azərbaycan və Mərkəzi Asiyanın iki ölkəsinin iştirakı ilə həyata keçiriləcək layihə Xəzər dənizində çirklənmə ilə mübarizə və bioloji müxtəlifliyin qorunması sahəsində regional əməkdaşlığın gücləndirilməsinə yönəlib. Maliyyələşdirmə paketi bu il aprelin 8-də təsdiqlənib. Qlobal Ekoloji Fond (GEF) icraedici qurumlar qismində Dünya Bankına və BMT-nin Ətraf Mühit Proqramına 11,74 milyon ABŞ dolları həcmində qrant ayırır. Vəsaitlər Azərbaycan, Qazaxıstan və Türkmənistanda layihənin həyata keçirilməsini təmin etməyə yönəldiləcək.
Dünya Bankı dəyəri 8,24 milyon ABŞ dolları olan layihəni Direktorlar Şurasının müzakirəsinə çıxaracaq. Layihənin icraedici agent qismində BMT-nin Layihə Xidmətləri İdarəsi çıxış edəcək. Bundan əlavə, UNOPS ətraf mühit və sosial standartlar (ESF) çərçivəsində alətlərin hazırlanması, həmçinin üç iştirakçı ölkə ilə qarşılıqlı fəaliyyətin koordinasiyası üçün 183 489 ABŞ dolları məbləğində GEF-in hazırlıq qrantını (PPG) əldə edəcək.
Təşəbbüsün əsas məqsədi Azərbaycan, Qazaxıstan və Türkmənistanın institusional potensialını gücləndirməklə region ölkələrinə çirklənmənin idarə olunması mexanizmlərinin təkmilləşdirilməsi və bioloji müxtəlifliyin qorunması tədbirlərinin genişləndirilməsi istiqamətində dəstək verməkdir. Layihə həmçinin dövlətlərin Tehran Konvensiyası və onunla əlaqəli protokollar üzrə öhdəliklərinin icrasına yönəlmiş mövcud səyləri tamamlayır.
Layihənin strukturu üç əsas komponentdən ibarətdir:
• çirklənmənin idarə olunması — 3,9 milyon ABŞ dolları;
• xüsusi mühafizə olunan təbiət əraziləri sisteminin inkişafı — 3,9 milyon ABŞ dolları;
• layihənin idarə olunması — 443,12 min ABŞ dolları.
• xüsusi mühafizə olunan təbiət əraziləri sisteminin inkişafı — 3,9 milyon ABŞ dolları;
