BAKI,VOA, Nailə Babazadə

Çin Xarici İşlər Nazirliyi ABŞ-ın Hörmüz boğazını blokadaya almaq cəhdini təhlükəli və məsuliyyətsiz addım kimi qiymətləndirib.

VOA xəbər verir ki, nazirliyin sözçüsü Quo Ciakun Pekində keçirilən mətbuat konfransında bildirib ki, tərəflər arasında müvəqqəti atəşkəs qüvvədə olduğu bir vaxtda ABŞ-ın hərbi gücünü artırması və boğazı hədəf alması gərginliyi daha da yüksəldir. Sözçü vurğulayıb ki, bu addım yalnız qarşıdurmanı dərinləşdirir və regionda onsuz da kövrək olan atəşkəs rejimini təhlükə altına qoyur.

Çin rəsmisi həmçinin ABŞ Prezidenti Donald Trampın Pekinə qarşı gömrük tarifləri ilə bağlı təhdidlərinə də toxunub. O qeyd edib ki, əgər Vaşinqton Çinin İrana silah satması iddiasını bəhanə edərək gömrük rüsumlarını artırsa Pekin buna qətiyyətli şəkildə qarşılıq verəcək.

Xatırladaq ki, ABŞ-ın Mərkəzi Komandanlığı (CENTCOM) Donald Trampın bəyanatından sonra aprelin 13-də İran limanlarına daxil olan və çıxan bütün gəmilər üçün dəniz blokadasına başlanılacağını elan edib.