BAKI,VOA, Nailə Babazadə
Almaniya Kansleri Fridrix Mers bazar ertəsi etdiyi çıxışda ABŞ-ın İrana qarşı apardığı siyasəti və diplomatik gedişatı kəskin şəkildə tənqid edərək, Vaşinqtonun Tehran tərəfindən "alçaldıldığını" bildirib.
VOA xəbər verir ki, Mers vurğulayıb ki, İran rəhbərliyi, xüsusilə də İnqilab Keşikçiləri Korpusu amerikalı rəsmiləri nəticəsiz danışıqlar üçün Pakistana qədər gətirtmək və sonra onları əliboş geri göndərməklə bütöv bir milləti rəzil edir.
Kansler Mers ABŞ və İsrailin 28 fevralda İrana hücumlara başlamazdan əvvəl avropalı müttəfiqləri ilə məsləhətləşmədiyini xatırladaraq, bu müharibənin Almaniya iqtisadiyyatına və vergi ödəyicilərinə çox baha başa gəldiyini qeyd edib. O, ABŞ-ın İranda hansı çıxış strategiyasını rəhbər tutduğunu anlamadığını və vəziyyətin getdikcə pisləşdiyini deyərək, mövcud böhranı İraq və Əfqanıstan müharibələri ilə müqayisə edib.
Bundan əlavə, Hörmüz boğazındakı blokadaya toxunan Mers, bu strateji su yolunun qismən minalandığını bildirib. O, Almaniya və Avropanın boğazı minalardan təmizləmək üçün xüsusi gəmilər göndərməyi təklif etdiyini, lakin münaqişənin ümumi gedişatından ciddi narahatlıq duyduğunu ifadə edib. Kanslerin bu bəyanatları NATO müttəfiqləri arasında İran və enerji təhlükəsizliyi məsələlərində yaranan dərin fikir ayrılıqlarını bir daha nümayiş etdirib.
