BAKI,VOA,Yusif Şərifzadə

Hörmüz boğazında ticarət gəmilərinin hərəkətində müəyyən canlanma müşahidə olunsa da, bölgədə təhlükəsizlik risklərinin davam etdiyi bildirilir. Təhlilçilər hesab edirlər ki, ABŞ ilə İran arasında uzunmüddətli razılaşma əldə olunmadıqca vəziyyət tam sabitləşməyəcək.

VOA xəbər verir ki, müdafiə məsələləri üzrə təhlilçi Aleks Əlfirraz Şirs bildirib ki, Hörmüz boğazından keçən ticarət gəmilərinin sayında artım müsbət haldır və bu, dünya iqtisadiyyatı üçün müəyyən rahatlıq yaradır.

Onun sözlərinə görə, buna baxmayaraq, Hörmüz boğazı ilə bağlı təhlükəsizlik riskləri aradan qalxmayıb və yaxın dövrdə də davam edə bilər.

Təhlilçi qeyd edib ki, ABŞ ilə İran arasında aparılan texniki danışıqlarda və memorandum üzrə müzakirələrdə boğazın gələcək statusu ilə bağlı qəti nəticə əldə olunmayıb.

Aleks Əlfirraz Şirs hesab edir ki, danışıqlar uğursuz olacağı təqdirdə İran Hörmüz boğazını siyasi və diplomatik təzyiq vasitəsi kimi istifadə etməyə davam edə bilər.