BAKI,VOA,Yusif Şərifzadə
Beynəlxalq Enerji Agentliyi (BEA) hazırda strateji neft ehtiyatlarının ikinci dəfə bazara çıxarılması məsələsini müzakirə etmir. Bunu qurumun icraçı direktoru Fatih Birol açıqlayıb.
VOA xəbər verir ki, Fatih Birol açıqlamasında BEA-nın qlobal neft bazarındakı vəziyyəti yaxından izlədiyini bildirib.
Birolun sözlərinə görə, mart ayında 400 milyon barel neftin ehtiyatlardan bazara çıxarılmasından sonra strateji ehtiyatların təxminən 80 faizi hələ də qalır.
BEA mart ayında tarixində ən böyük həcmdə fövqəladə neft ehtiyatının istifadəyə verilməsi barədə qərar qəbul etmişdi. Həmin qərar çərçivəsində üzv ölkələrin ehtiyatlarından ümumilikdə 400 milyon barel neftin bazara çıxarılması nəzərdə tutulmuşdu.
Bu addım ABŞ və İsrailin İranla müharibəsinin başlamasından təxminən iki həftə sonra atılmışdı. Qarşıdurma və enerji daşımaları ilə bağlı yaranan təhlükələr qlobal neft bazarında təchizat narahatlığını artırmışdı.
Bununla belə, BEA rəhbərinin son açıqlaması qurumun indiki mərhələdə strateji ehtiyatlardan əlavə neft buraxılmasına ehtiyac görmədiyini göstərir.
Birol BEA-nın bazardakı dəyişiklikləri izləməyə davam etdiyini vurğulayıb. Strateji ehtiyatların böyük hissəsinin qorunub saxlanılması isə mümkün yeni təchizat böhranı zamanı qurumun əlavə müdaxilə imkanlarının qalması deməkdir.
