BAKI,VOA Orxan Qədirzadə
İsrail ordusu İordan çayının qərb sahilində keçirdiyi əməliyyatlar zamanı 30 fələstinlini saxlayıb, Qəsrə qəsəbəsində isə üç evin mühasirəsini davam etdirib.
Fələstinli Məhbuslar Klubunun məlumatına görə, saxlanılanlar arasında bir jurnalist də var. İordan çayının qərb sahilinin müxtəlif ərazilərində həyata keçirilən basqınlar zamanı evlər və avtomobillər də axtarılıb.
Ordunun Əl-Xəlil şəhərinin cənubundakı Zahiriyyə qəsəbəsinə keçirdiyi reyd zamanı daha 8 fələstinli saxlanılıb.
Qəsrədə isə İsrail ordusu və məskunlaşanlar üç fələstinli ailənin evini 11 gündür mühasirədə saxlayır. Qəsəbə meri Əbdüləzım əl-Vadi ailələrin hərəkət imkanlarının məhdudlaşdırıldığını və ağır şəraitdə yaşadığını bildirib. İsrail ordusu ərazini “hərbi zona” elan edib.
Fələstin Qızıl Aypara Cəmiyyəti Qəsrənin Rəs əl-Eyn bölgəsində İsrail əsgərləri tərəfindən döyüldüyü bildirilən bir fələstinlinin xəstəxanaya çatdırıldığını açıqlayıb.
İsrailin “B’Tselem” insan haqları təşkilatı isə İordan vadisində 47 fələstinli ailənin su təchizatının kəsilməsi səbəbilə yaxın zamanda köçürülmə təhlükəsi ilə üzləşdiyini bildirib.
BMT-nin məlumatına görə, 2026-cı ilin əvvəlindən İordan çayının qərb sahilində 1 430-dan çox məskunlaşan hücumu qeydə alınıb və bu hadisələr nəticəsində təxminən 3 800 fələstinli, o cümlədən uşaqlar, öz yaşayış yerlərini tərk etmək məcburiyyətində qalıb.
