BAKI,VOA
İordan çayının qərb sahilində İsrail məskunlaşanlarının və İsrail qüvvələrinin fələstinlilərə qarşı hücumları fonunda Fələstin E1 məskunlaşma layihəsinin dayandırılması üçün BMT və Təhlükəsizlik Şurasına müraciət edib.
Fələstinin BMT-dəki daimi nümayəndəsi Riyad Mənsur BMT baş katibi Antonio Quterreşə, Təhlükəsizlik Şurasının sədri Danimarkanın nümayəndəsinə və BMT Baş Assambleyasının sədrinə məktublar göndərərək layihəyə qarşı təcili tədbir görülməsini istəyib.
Fələstin tərəfi E1 planını qanunsuz hesab edir və onun İsrailin əraziləri mərhələli şəkildə ilhaq siyasətinin mühüm hissəsinə çevrilə biləcəyini bildirir. Müraciətdə layihənin Fələstin ərazisinin coğrafi bütövlüyünü pozacağı və gələcək dövlətin ərazi baxımından vahidliyini çətinləşdirəcəyi qeyd olunub.
Bölgədə gərginlik də artır. Beddu qəsəbəsində İsrail məskunlaşanlarının avtomobillərə daş atması nəticəsində bir fələstinli uşağın yaralandığı bildirilib. İsrail qüvvələrinin Tubas, Nablus, Dura, Əmari düşərgəsi və Sərta daxil olmaqla bir sıra ərazilərə basqın etdiyi qeyd edilir.
Fələstin xəbər agentliyinin məlumatına görə, Xirbət əl-Hədidiyyədə məskunlaşanlar fələstinlilərin heyvanlarını otarmasına mane olub. Cənubi Xəlildə isə fermer İbrahim Nəvaci heyvanlarını otardığı vaxt saxlanılıb. Məsfir Yatta bölgəsində məskunlaşanların fələstinli fermerlərin torpaqlarına heyvan buraxdığı da bildirilib.
Avropa Komissiyasının sədri Ursula fon der Lyayen İsrail hökumətinin E1 layihəsi üzrə tender elan etməsini qəbuledilməz adlandırıb. O, Avropa İttifaqının Şərqi Qüdsdə və işğal olunmuş Fələstin ərazilərində məskunlaşma fəaliyyətlərinə qarşı mövqeyini təkrarlayıb.
E1 layihəsi Şərqi Qüdsün yaxınlığında yerləşən ərazi vasitəsilə Maale Adumim məskunlaşma məntəqəsini Qərbi Qüds istiqaməti ilə əlaqələndirməyi nəzərdə tutur. Fələstin tərəfi layihənin İordan çayının qərb sahilinin şimal və cənub hissələri arasındakı əlaqəni kəsə və Şərqi Qüdsü bölgənin digər hissələrindən ayıra biləcəyini bildirir.
Məlumata görə, İsrail 1999-cu ildə həmin ərazidə təxminən 12 min dunam Fələstin torpağını müsadirə edib və burada 4 mindən çox yaşayış vahidi və otel tikilməsi planlaşdırılıb.
