Səudiyyə Ərəbistanının Kral Salman adına Yardım və Humanitar Fəaliyyətlər Mərkəzi (KSrelief) Fələstin xalqına davamlı dəstək kampaniyası çərçivəsində Qəzza zolağında təhlükəsiz içməli su təminatı layihəsinə start verib. Layihə çərçivəsində sutkada təxminən 500 min litr təhlükəsiz içməli suyun su tankerləri vasitəsilə məcburi köçkün düşərgələrinə paylanması nəzərdə tutulur ki, bu təşəbbüsdən 100 minə yaxın insan faydalanacaq.
Layihənin açılış mərasimində beynəlxalq təşkilatların nümayəndələri, yerli ictimaiyyət və su sektorunda fəaliyyət göstərən qurumların təmsilçiləri iştirak edərək təşəbbüsün Qəzza zolağında su təhlükəsizliyinin gücləndirilməsinə verdiyi töhfədən bəhs edən sənədli filmi izləyiblər.
Bu təşəbbüs Səudiyyə Ərəbistanının Qəzzadakı humanitar fəaliyyət coğrafiyasını daha da genişləndirir. "KSrelief" bundan əvvəl Xan Yunis və Deyr əl-Bəlah vilayətlərində dörd sutəmizləyici (duzsuzlaşdırma) stansiyanın qurulması layihəsini həyata keçirib.
Səudiyyə Ərəbistan Qəzzaya yeni humanitar yardım göndərib
Yeni layihə su və kanalizasiya sistemlərinə dəyən irimiqyaslı ziyanın fəsadlarını yumşaltmağa, habelə su quyularının və duzsuzlaşdırma qurğularının azalmış istismar potensialını kompensasiya etməyə kömək edəcək. Səudiyyə Ərəbistanı təhlükəsiz içməli su təminatı və bərpa üçün əlverişli şərait yaratmaqla Qəzza zolağındakı əhalinin yaşayış şəraitini yaxşılaşdırmaq öhdəliyinə sadiq olduğunu bir daha nümayiş etdirir.
