BAKI, AzerVoice,Nailə Babazadə
Türkiyənin Xarici İşlər naziri Hakan Fidan və Misirin Xarici İşlər naziri Bədir Əbdülati, Misirdə keçirdikləri görüşdən sonra birgə mətbuat konfransı təşkil ediblər.
AzerVoice xəbər verir ki,görüşdə bölgə məsələləri, xüsusilə Suriya və Fələstindəki vəziyyət əsas gündəm mövzuları olub.
Nazir Əbdülati çıxışında bildirib ki, Misir və Türkiyə Suriyanın ərazi bütövlüyünə və bütünlüyünə dəstək verir, eyni zamanda heç kimi istisna etməyən daxili siyasi həllin vacibliyi mövzusunda razılığa gəliblər.
“Bölgənin ərazi bütövlüyünə hörmət göstərmək əsas məsələdir. Bu, yalnız Suriya üçün deyil, hər yer üçün keçərlidir. Beynəlxalq hüquqa hörmət prinsipi təməl olmalıdır. Hərbi yolla həll yoxdur. Hamımız siyasi həll yolunda anlaşmadığımız müddətdə çıxış yolu olmayacaq,” – deyə Əbdülati vurğulayıb.
Əbdülati həmçinin bildirib ki, heç bir tərəf daha çox silaha sahib olduğu üçün başqa bir ölkənin daxili işlərinə qarışa bilməz.
Nazir, Qəzzədə yaşanan humanitar faciənin də Hakan Fidanla görüşlərinin əsas mövzularından biri olduğunu bildirib və bölgədə sabitliyin yalnız siyasi yanaşma ilə əldə edilə biləcəyini qeyd edib.
Nazir Əbdülati həmçinin Azərbaycan və Ermənistan arasında əldə olunacaq mümkün razılaşmanı ümidlə qarşıladıqlarını bildirib:
“Bu konstruktiv mövqenin davam etməsini və onun bölgəmizə də müsbət təsir göstərməsini gözləyirik. Eyni mövqenin Fələstin məsələsinə də əks olunmasını arzulayırıq. Siyasi həll yollarına açıq vizyonları dəstəkləyirik. Bizə sabitlik gətirəcək yanaşmalara ehtiyac var.”
