BAKI, VOA
Türkiyə, Azərbaycan və Gürcüstan xarici işlər nazirlərinin İstanbulda keçirilən 10-cu üçtərəfli görüşünün yekununda İstanbul Bəyannaməsi qəbul olunub.
VOA xəbər verir ki, sənəddə üç ölkə arasında mövcud olan dərin dostluq, mehriban qonşuluq, qarşılıqlı hörmət və etimad münasibətlərinin əhəmiyyəti vurğulanıb.
Bəyannamədə siyasi, iqtisadi, ticarət, təhlükəsizlik, elm, texnologiya və mədəniyyət sahələrində əməkdaşlığın daha da inkişaf etdirilməsi istiqamətində birgə iradə ifadə olunub. Tərəflər dövlətlərin suverenliyinə, ərazi bütövlüyünə və beynəlxalq səviyyədə tanınmış sərhədlərinin toxunulmazlığına dəstəklərini bir daha təsdiqləyiblər.
Sənəddə regional və qlobal çağırışlarla mübarizədə üçtərəfli əməkdaşlığın mühüm rolu qeyd olunub. Regionun potensialının tam reallaşdırılması üçün sülhün, təhlükəsizliyin və sabitliyin vacibliyi xüsusi vurğulanıb.
Bəyannamədə Bakı-Tbilisi-Ceyhan boru kəmərinin və Cənub Qaz Dəhlizinin regional və Avropanın enerji təhlükəsizliyinə verdiyi töhfə yüksək qiymətləndirilib. Eyni zamanda, Trans-Xəzər Şərq-Qərb Orta Dəhlizi daxil olmaqla, nəqliyyat və tranzit imkanlarının genişləndirilməsi istiqamətində görülən işlərin strateji əhəmiyyəti qeyd edilib.
Nazirlər Gürcüstanda Axalkalaki Beynəlxalq Dəmir Yolu Stansiyasında Bakı-Tbilisi-Qars dəmir yolu layihəsi çərçivəsində aparılan modernləşdirmə işlərinin başa çatmasını da alqışlayıblar.
Sənəddə yaşıl enerji sahəsində əməkdaşlığın genişləndirilməsi, enerji ötürülməsi imkanlarının artırılması və bərpaolunan enerji mənbələrindən istifadənin təşviqi istiqamətində birgə fəaliyyətə dəstək ifadə olunub.
Ətraf mühitin qorunması və iqlim dəyişiklikləri ilə mübarizə sahəsində regional əməkdaşlığın gücləndirilməsinin vacibliyi vurğulanıb. Türkiyənin İqlim Dəyişikliyi üzrə Tərəflər Konfransının 31-ci sessiyasına sədrliyi alqışlanıb, Azərbaycanın Ümumdünya Şəhərsalma Forumunun 13-cü sessiyasına uğurlu ev sahibliyi yüksək qiymətləndirilib.
Bəyannamədə terrorizm, insan alveri, qanunsuz silah və narkotik dövriyyəsi, miqrant qaçaqmalçılığı, çirkli pulların yuyulması, kibercinayətkarlıq və digər transmilli təhdidlərə qarşı birgə mübarizənin davam etdirilməsi ilə bağlı öhdəlik də bir daha təsdiqlənib.
Sənədin sonunda üçtərəfli görüşlərin müntəzəm keçirilməsinin vacibliyi qeyd olunub və növbəti, 11-ci üçtərəfli görüşün 2027-ci ildə Gürcüstanda keçirilməsi barədə qərar qəbul edildiyi bildirilib.
