Körfəz ölkələri öz təhlükəsizliyini təmin etmək üçün təkcə ABŞ və digər beynəlxalq hərbi ittifaqlara güvənə bilməz və müdafiə sahəsində özünü təminetmə qabiliyyətini artırmalıdır. ArabAZ xəbər verir ki, bu barədə Qətər Xarici İşlər Nazirliyinin rəsmi nümayəndəsi Macid əl-Ənsari Birləşmiş Ərəb Əmirliklərinin paytaxtı Əbu-Dabidə keçirilən "Hili Forumu"nda bəyan edib.

"Biz Körfəzdə dərk etməliyik ki, regionda beynəlxalq qüvvələrin olması və ABŞ ilə strateji müttəfiqlik olduqca vacibdir, lakin kifayət deyil", - deyə diplomat forumdakı çıxışında vurğulayıb.

Onun sözlərinə görə, təhlükəsizlik məsələsində özünü təmin etmək irəliyə doğru yeganə yoldur.
“Bəli, tərəfdaşlarımıza ehtiyacımız var. Bəli, müttəfiqlərimiz lazımdır. Lakin biz təhlükəsizliyimiz üçün təkcə onlardan asılı ola bilmərik". – deyə o qeyd edib.

Bu bəyanat xüsusilə diqqət çəkir, çünki Qətər ABŞ ilə İran arasındakı müharibədə əsas vasitəçi rolunu oynayır və eyni zamanda xüsusilə enerji infrastrukturu olmaqla ağır İran hücumlarına məruz qalıb.

Qətər Yaxın Şərqdə ən böyük ABŞ hərbi bazasına ev sahibliyi edir. Müharibə boyunca İran ABŞ zərbələrinə cavab olaraq həm Amerika hərbi obyektlərinə, həm də regionun enerji infrastrukturuna hücumlar təşkil edib.

Altı aydır davam edən münaqişədən sonra tərəflər çıxılmaz vəziyyətə düşüb; Tehran strateji Hörmüz boğazında dəniz hərəkətini pozur, Vaşinqton isə İran limanlarına qarşı əks-blokada tədbirlərini gücləndirir.

Ötən ay Qətərin Baş naziri Şeyx Məhəmməd bin Əbdülrəhman Əl Tani vasitəçilik səyləri çərçivəsində Tehrana səfər etmişdi. Həmin səfər İran və boğaza həmsərhəd olan Omanın müvəqqəti gəmiçilik dəhlizinin yaradılması və minalardan təmizlənmə məsələsini müzakirə etdiklərini bildirməsindən sonra baş tutmuşdu.