BAKI, AzerVoice
Qazaxıstan Prezidenti Kasım-Jomart Tokayev “NVIDIA H200” qrafik prosessorlarına əsaslanan və ölkənin ilk milli superkompüteri hesab edilən sistemin açılış mərasimində iştirak edib.
AzerVoice-un məlumatına görə, Tokayev bu məqsədlə “Alemcloud” adlı yeni yaradılmış milli superkompüter mərkəzinə baş çəkib.
Uçsuz-bucaqsız hesablama gücünə malik bu sistem, ölkənin Rəqəmsal İnkişaf, İnnovasiya və Aerokosmik Sənaye Nazirliyinin beynəlxalq tərəfdaşları ilə əməkdaşlıq çərçivəsində qurulub və istifadəyə verilib.
Yeni superkompüter FP8 hesablamaları ilə 2 eksaflopadək performans göstəricisinə malikdir. Bu göstərici onu yalnız Qazaxıstanda deyil, bütövlükdə Mərkəzi Asiyada ən güclü hesablama mərkəzlərindən birinə çevirir.
Prezident Tokayev çıxışında bildirib ki, bu layihə ölkənin əsas sahələrinin rəqəmsallaşdırılması baxımından mühüm addımdır və Qazaxıstanın texnoloji inkişafına ciddi töhfə verəcək.
Tokayev “Alemcloud” mərkəzində yerli mütəxəssislər tərəfindən hazırlanan bir sıra süni intellekt layihələri ilə də tanış olub. Buraya “AlemLLM” adlı böyük dil modeli, rəqəmsal kitab platforması olan “AI Kitap” və daşınmaz əmlak xidmətləri üçün hazırlanmış “Baspana Hub” layihələri daxildir.
O, ölkədə süni intellekt texnologiyalarının inkişafını və bu sahədə yerli innovativ təşəbbüslərin dəstəklənməsini vacib strategiya kimi qiymətləndirib.
Yeni superkompüterin istifadəyə verilməsi ilə Qazaxıstan elmi tədqiqatlardan tutmuş dövlət idarəçiliyinə qədər müxtəlif sahələrdə rəqəmsal transformasiya üçün daha böyük imkanlara sahib olacaq.
