Səudiyyə Ərəbistanında Biznesə İnam İndeksi (BCI) mart ayındakı səngümədən sonra bərpa dinamikasını davam etdirərək iyulda 56,5 bənd səviyyəsində möhkəmlənib və optimizm zonasında qalıb.
Ümumi Statistika İdarəsi tərəfindən açıqlanan göstərici iyun ayındakı 56,6 bənddən cüzi şəkildə - cəmi 0,03 bənd geriləsə də, neytral sayılan 50 bəndlik hədddən xeyli yuxarıda qərarlaşıb. Bu da biznes mühitində nikbinliyin qorunub saxlanmasından xəbər verir.
Mart ayında 52,1 bəndə düşən indeks apreldə 54,5 bəndə yüksəlmiş, mayda 55,6 və iyunda 56,6 bəndədək möhkəmləndikdən sonra iyulda həmin səviyyəyə yaxın göstəricini qoruyub saxlamışdı.
ABŞ-İran münaqişəsinin Yaxın Şərqin bəzi bölgələrində təchizat zəncirini və sənaye fəaliyyətini pozması nəticəsində yaranan qeyri-müəyyənliyə baxmayaraq, Krallığın Biznesə İnam İndeksi sabit artım tempini nümayiş etdirib.
Biznesə inamın artması özəl sektorun fəaliyyətini əks etdirən ümumi göstəricilərlə üst-üstə düşür. Bu ayın əvvəlində dərc olunmuş hesabatda qeyd olunur ki, regional çətinliklərə baxmayaraq, istehsalın və yeni sifarişlərin davamlılığı sayəsində Krallığın Satınalma Menecerləri İndeksi (PMI) iyulda 53,1 bənd təşkil edib.
Rəsmi qurumun son hesabatında bildirilir: "İndeks iqtisadi fəaliyyətin sabitliyinə və müxtəlif sektorlarda davamlı artıma inam fonunda biznes sektorunda hökm sürən optimizmi əks etdirir".
İyul ayında sənaye sektorunda indeks iyun ayındakı 55 bəndlə müqayisədə 0,2 bənd azalaraq 54,7 bənd səviyyəsində qərarlaşıb.
Bu eniş sənaye müəssisələrinin mövcud xammal xərcləri və gələn ay üçün gözləntilərə dair inam səviyyəsinin bir qədər aşağı düşməsi ilə izah olunur.
Xidmət sektoru isə iyun ayındakı 55,5 bəndlik göstəricidən 0,2 bəndlik geriləmədən sonra 55,3 bənd qeydə alaraq optimizm səviyyəsini qoruyub. Azalma oxşar şəkildə mövcud xammal xərclərinə və müvafiq gözləntilərə olan inamın zəifləməsi ilə əlaqələndirilib.
Tikinti sektoru iyun ayındakı 57,8 bəndlik göstəricidən 0,1 bəndlik azalmaya baxmayaraq 57,7 bənd təşkil edib və müəssisələr arasında optimizmin davam etdiyini göstərib.
"Tikinti sektorundakı bu azalma cari ayda xammal xərcləri və gələn ay üçün bu xərclərlə bağlı gözləntilərə dair müəssisələrin inamının azalması ilə bağlıdır", - deyə hesabatda vurğulanır.
Bu ayın əvvəlində açıqlanan Tikinti İndeksi göstərdi ki, əsas indeks iyun ayındakı 56,3 bənddən 55,2 bəndə düşsə də, yeni sifarişlərin son beş ayın maksimumuna çatması sayəsində Səudiyyə Ərəbistanının tikinti sektoru iyulda ardıcıl üçüncü ay böyümə nümayiş etdirib.
Aşağı düşməyə baxmayaraq, indeks artımı tənəzzüldən ayıran 50 bəndlik həddin rahatlıqla üzərində qalıb və müşahidələrin başladığı yanvar ayından bəri ikinci en yüksək göstərici kimi qeydə alınıb.
Biznesə İnam İndeksi Bütün İqtisadi Fəaliyyət Növlərinin Beynəlxalq Standart Sahə Təsnifatına (ISIC4) uyğun olaraq qeyri-neft iqtisadi fəaliyyətləri üzrə fəaliyyət göstərən subyektlər arasında aparılan sorğuya əsaslanır, mövcud biznes şəraiti və gələcək gözləntilərə dair optimizm səviyyəsini əks etdirən iqtisadi göstəricidir.
Krallığın qeyri-neft iqtisadiyyatının gücünü daha da möhkəmləndirən başqa bir rəsmi hesabatda göstərilir ki, 2026-cı ilin ikinci rübündə Səudiyyə Ərəbistanının real ümumi daxili məhsulunun 4,8 faiz azalmasına baxmayaraq, qeyri-neft fəaliyyətləri ötən ilin eyni dövrü ilə müqayisədə 0,6 faiz artıb.
