Fransa Prezidenti Emmanuel Makron bazar günü Səudiyyə Ərəbistanının vəliəhd şahzadəsi və Baş naziri Məhəmməd bin Salmanı iki günlük rəsmi səfər çərçivəsində qəbul edəcək. Bu barədə Yelisey Sarayının yaydığı bəyanatda bildirilir.
Bu səfər Makronun 2024-cü ilin dekabrında Səudiyyə Ərəbistanına etdiyi səfərin davamıdır.
"Bu səfər Səudiyyə Ərəbistanı Krallığı ilə Fransa arasındakı dialoqun dinamizmini əks etdirir və iki ölkə arasında strateji tərəfdaşlığı daha da gücləndirmək üçün fürsət yaradacaq. Bu məqsədlə Respublika Prezidenti və Vəliəhd Şahzadə ilk dəfə olaraq Fransa-Səudiyyə Strateji Tərəfdaşlıq Şurasının iclasını keçirəcəklər" – deyə, Yelisey Sarayının bəyanatında qeyd olunur.
Emmanuel Makronun Suriyaya rəsmi səfəri başlayıb
İki lider Fransa-Səudiyyə tərəfdaşlığını formalaşdıran mühüm iqtisadi və strateji məsələləri müzakirə edəcək, Yaxın və Orta Şərqdə sabitlik və sülhün təşviqi üçün Fransa ilə Körfəz tərəfdaşları arasında sıx koordinasiyanın vacib olduğu bir vaxtda əsas regional məsələlər ətrafında fikir mübadiləsi aparacaqlar.
Hər iki lider həmçinin bazar günü təsis edildiyi vaxtdan bəri ilk dəfə Səudiyyə Ərəbistanından kənarda - Parisdə keçirilən Kibersport üzrə Dünya Kubokunun bağlanış mərasimində iştirak edəcək.
Yelisey Sarayı bildirib ki, bu mötəbər qlobal çempionata ev sahibliyi etmək xüsusilə "Paris 2024" Olimpiya və Paralimpiya Oyunlarının uğurundan sonra Fransanın böyük beynəlxalq idman tədbirləri üçün cəlbedici məkan olduğunu bir daha nümayiş etdirir. Bəyanatda əlavə olunub ki, bu addım eyni zamanda Fransa və Səudiyyə Ərəbistanının idman və mədəniyyəti iki ölkə arasında əlaqələrin yaxınlaşmasının hərəkətverici qüvvəsinə çevirmək üzrə ortaq ambisiyasını əks etdirir.
