BAKI,VOA
"Manga Arabia" şirkəti ilə "Zeez Animation" studiyası arasında Səudiyyə Ərəbistanının məşhur "Əs-Səddad macəraları" (Al-Saddad Adventures) animasiya serialının eksklüziv manqa formatında yayımlanmasına dair strateji tərəfdaşlıq sazişi imzalanıb.
Ər-Riyadda baş tutan imzalanma mərasimində "Manga Arabia"nın baş redaktoru Dr. İsam Buxari və "Zeez Animation"ın rəhbəri Əbdüləziz Məhəmməd Osman iştirak ediblər. Razılaşmaya əsasən, cizgi filminin süjet xəttini əhatə edən 13 fəsildən ibarət manqa layihəsi həm çap formatında, həm də rəqəmsal platformalarda oxuculara təqdim ediləcək.
Layihə yerli Səudiyyə personajlarını və hekayələrini qlobal səviyyədə tanıtmaq, habelə yerli əqli mülkiyyətin kommersiya və lisenziyalaşdırma imkanlarını genişləndirmək məqsədi daşıyır. Mobil tətbiqləri 190-dan çox ölkədə 13 milyondan çox yüklənən "Manga Arabia" bu addımla ərəb cizgi sənayesinin beynəlxalq bazarlardakı mövqeyini daha da gücləndirməyi hədəfləyir.
