BAKI,VOA, Həcər Nazarova

Səudiyyə Ərəbistanının Kommunikasiya, Kosmos və Texnologiyalar Komissiyası ilə Dahrandakı Kral Əbdüləziz Dünya Mədəniyyəti Mərkəzinin (Ithra) rəqəmsal rifah təşəbbüsü “Sync” arasında əməkdaşlıq çərçivəsində dayanıqlılıq üzrə dörd yeni təşəbbüsə start verilib.

VOA xəbər verir ki, təşəbbüslər tərəflər arasında imzalanmış anlaşma memorandumuna əsaslanır. Yeni layihələr komissiya ilə Ithra arasında rəqəmsal dayanıqlılıq ekosisteminin inkişafına yönəlmiş əməkdaşlığın genişləndirilməsini nəzərdə tutur.

Təşəbbüslərin əsas istiqaməti qabaqcıl tədqiqatlar, araşdırmalar və xüsusi hazırlanmış akademik proqramlar vasitəsilə rəqəmsal rifahın təşviq edilməsidir. Bu çərçivədə rəqəmsal texnologiyaların fərdlərə və cəmiyyətə təsiri araşdırılacaq.

Səudiyyə Ərəbistanı süni intellekt sahəsində liderliyə can atır

Ithra-nın yaydığı açıqlamaya görə, layihələr çərçivəsində beynəlxalq təşkilatlarla birgə proqramlar və məqsədyönlü seminarlar təşkil olunacaq. Bu tədbirlər vasitəsilə rəqəmsal texnologiyalardan məsuliyyətli istifadə ilə bağlı maarifləndirmənin artırılması nəzərdə tutulur.

Proqramlar bilik və təcrübə mübadiləsinin genişləndirilməsinə, daha səmərəli qərarların qəbuluna və siyasətin formalaşdırılmasına dəstək verməyə xidmət edəcək. Təşəbbüslərin Səudiyyə Ərəbistanının “Vision 2030” strategiyasına uyğun olaraq rəqəmsal texnologiyalardan məsuliyyətli və dayanıqlı istifadənin inkişafına töhfə verməsi gözlənilir.