BAKI, AzerVoice, Orxan Qədirzadə
Şimali Kipr Türk Respublikası (ŞKTR) Xarici İşlər Nazirliyi, Norveç hökumətinin 65 ildən artıq müddətdir Cənubi Kipr Yunan Administrasiyasına (GKRY) tətbiq etdiyi silah embarqosunu ləğv etməsinə sərt reaksiya verib.
AzerVoice xəbər verir ki, Nazirliyin yazılı açıqlamasında Norveç Parlamentinin 1959-cu ildə qəbul etdiyi qanuna əsasən, daxili qarşıdurma yaşayan və ya münaqişə riski olan ölkələrə silah satışının qadağan edildiyi xatırladılıb. Məhz bu çərçivədə GKRY-yə qarşı illərdir qüvvədə olan qadağanın, Norveç Xarici İşlər naziri Espen Barth Eide tərəfindən 7 noyabr 2025-ci ildə GKRY lideri Nikos Hristodulidislə aparılan birbaşa əlaqə nəticəsində qaldırıldığı bildirilib.
ŞKTR XİN vurğulayıb ki, Norveçin ənənəvi olaraq “sülh mərkəzli” xarici siyasəti ilə ziddiyyət təşkil edən bu addım, Şərqi Aralıq dənizində onsuz da gərgin olan balansı daha da pozur.
“Norveç hökumətinin Cənubi Kipr tərəfinin silahlanmasına yol açan bu qərarı, bölgədəki həssas tarazlığa ciddi zərbə vurur və regional sabitliyə töhfə verməkdən son dərəcə uzaqdır.”
Açıqlamada bildirilib ki, ada üzərində ədalətli və davamlı sülh yalnız iki xalqın bərabər hüquqlarının tanınması və qarşılıqlı güvən mühitinin təmin edilməsi ilə mümkündür. Bu kimi birtərəfli addımlar isə həmin məqsədə çatmağı çətinləşdirir.
“Bu qərar, Kipr rum rəhbərliyinin təxribatçı fəaliyyətlərini təşviq edir, silahlanma meyillərinə xidmət edir və mövcud vəziyyəti təhlükəyə atır.”-deyə açıqlamada bildirilib.
ŞKTR hökuməti Norveç rəhbərliyini bu addımı geri çəkməyə, Kipr reallıqlarına əsaslanan, regional sülh və təhlükəsizliyi dəstəkləyən mövqe nümayiş etdirməyə çağırıb. Açıqlamada həmçinin qeyd olunub ki, Şimali Kipr bu prosesdə Türkiyə ilə birgə zəruri addımlar atmaqda davam edəcək.
