Bakı, AzerVoice

Bildiyiniz kimi bu il Azərbaycan Türkiyədə keçirilən 41-ci Beynəlxalq İstanbul Fuarında Fəxri Qonaq statusunda təmsil olunur. Türk Mədəniyyəti və İrsi Fondu da Azərbaycan Respublikası Mədəniyyət Nazirliyinə ayrılmış stenddə öz nəşrlərini sərgiləyir, həmçinin bir sıra tədbirlər təşkil edir. Fondun təşkil etdiyi növbəti tədbir beynəlxalq təşkilatın nəşr etdiyi görkəmli türk mütəffəkkiri Süleyman Çələbinin alman və türk dillərində işıq üzü görən “Mövlud” kitabının təqdimat mərasimi olub.

Əsrlərdir ki, türk dünyasında ən çox oxunan kitablardan biri olan, bu gün də mövludnamələr içərisində ən çox istinad edilən əsas mənbələrdən sayılan Süleyman Çələbinin “Mövlud” kitabının təqdimat mərasimi İstanbul Kitab Sərgisində ziyarətçilərin böyük marağına səbəb olub. Təqdimat mərasimini Türk Mədəniyyəti və İrsi Fondunun əməkdaşı Fərid Hüseyn açaraq Fondun beynəlxalq müstəvidə ciddi əhəmiyyət daşıyan layihələrindən, mədəni irsin qorunması, o cümlədən türk xlaqlarının mədəniyyətlərinin dünya müstəvisində tanıdılması, həmçinin Fondun təsis etdiyi üç kitab seriyası – “Türk dünyasının görkəmli şəxsiyyətləri”, “Türk dünyasının elmi inciləri”, “Türk dünyasının ədəbi inciləri” haqqında sərgi iştirakçılarına ətraflı məlumat verib. F.Hüseynov türk dünyasının dahi şəxsiyyətlərinin həm doğum, həm də anım illərinin Türk Mədəniyyəti və İrsi Fondu tərəfindən daim diqqət mərkəzində saxlanılaraq onların həyat və yaradıcılığı barədə danışıb, həmçinin yaradıcı irslərinin dünyada təbliği yönündə Fondun gördüyü çoxsaylı işləri diqqətə çatdırıb. Süleyman Çələbinin “Mövlud” kitabının da Fond tərəfindən 2022-ci ildə – görkəmli sənətkarın “Anma ili” çərçivəsində, vəfatının 600 illiyində yayımlandığını vurğulayıb.

Daha sonra kitabın alman dilindəki nəşrinin redaktoru, tanınmış yazar Orxan Aras Süleyman Çələbinin şəxsiyyəti, həyatı və əsərləri haqqında tədbir iştirakçılarına məlumat verərək, Türk Mədəniyyəti və İrsi Fondunun Aşıq Veysəl, Ömər Seyfəddin və digər klassiklərin əsərlərini alman dilinə nəşr etdirərək dünyada təbliğ etməsini türk irinin bütün cahana yayılması baxımından yüksək qiymətləndirdiyini bildirib.

Tədbirin yekununda gənc yazar, Azərbaycan Yazıçılar Birliyinin üzvü Rəvan Cavid “Mövlud” əsərinin mahiyyəti haqqında dinləyicilərə məlumat verərək Türk Mədəniyyəti və İrsi Fonduna bu cür dəyərli əsərlərin beynəlxalq aləmdə təbliğindəki rolundan dolayı təşəkkürünü bildirib.

Sonda oxucularla xatirə şəkili çəkilib və sərgi ziyarətçilərinə Fond adından Süleyman Çələbinin “Mövlud” kitabı hədiyyə edilib.