Bakı. VOA:

Türkiyə Azərbaycana 100 min iynəyarpaqlı və yarpaqlı ağac tingi göndərib.

VOA-in xəbərinə görə, bu barədə Türkiyənin Kənd Təsərrüfatı və Meşəçilik Nazirliyi yanında Meşəçilik idarəsindən məlumat verilib.

Tinglər Eskişehir, Konya, Mersin, Şanlıurfa və Sakarya əyalətlərində meşə təsərrüfatında yetişdirilib.

İdarədən verilən məlumata görə, Bakıda və Azərbaycanın Qarabağ bölgəsində qardaş dövlətin ekologiyasına töhfə verəcək tinglərin əkilməsi nəzərdə tutulub.

Bundan əlavə, İdarə təhlükəli zərərvericiyə – "qatil arı" da adlandırılan (Dryocosmus kuriphilus) həşərata qarşı mübarizədə Azərbaycana dəstək planlarını bölüşüb.

Vətəni Çin olan bu zərərverici 2014-cü ildə Türkiyədə aşkarlanıb və o vaxtdan ölkənin müxtəlif bölgələrində meşələrə və meyvə bağlarına ciddi ziyan vurub.

Bu arılarla mübarizədə onların təbii düşmənlərindən geniş istifadə olunur.

Meşəçilik idarəsi bildirir ki, bu il təbiətdə "qatil arı"larla qidalanan 50 min yırtıcı həşərat da Azərbaycana göndərilib.

Türkiyədən olan mütəxəssislər azərbaycanlı həmkarları üçün "qatil arılar"la effektiv mübarizə mövzusunda təlimlər təşkil edirlər.