Bakı, AzerVoice
Bakı Təşəbbüs Qrupunun İcraçı direktoru Abbas Abbasov Simon Bolivar İnstitutunun Xalqlar arasında Sülh və Həmrəylik Fondunun Prezidenti Blanka Qomesin dəvəti ilə iştirak etdiyi “Müstəmləkəçilik, Neokolonializm və onun nəticələri” adlı beynəlxalq konfransda çıxış edib.
AzerVoice xəbər verir ki, Abbasov çıxışında Bakı Təşəbbüs Qrupunun (BTQ) müstəmləkəçilik və neokolonializmə qarşı aparılan qanuni mübarizəni fəal şəkildə dəstəklədiyini, təşkilatın beynəlxalq ictimaiyyətə bu məsələlərin reallıqlarını çatdırmaq üçün geniş fəaliyyət göstərdiyini bildirib.
O, Azərbaycanın 2019–2023-cü illərdə Qoşulmama Hərəkatına sədrliyini, 2023-cü ilin iyulunda Bakıda təşkil olunan “Müstəmləkəçiliyin tamamilə aradan qaldırılmasına doğru” adlı konfrans çərçivəsində BTQ-nin yaradılmasının qərarlaşdırıldığını qeyd edib. Təşkilatın müstəmləkəçilik və neokolonializmin ləğvi, dekolonizasiya hüququnun təşviqi və əsarət altında olan xalqlara dəstək verməyi məqsəd qoyduğunu vurğulayıb.
Abbasov, BTQ-nin qlobal dekolonizasiya hərəkatında nüfuzlu platformaya çevrildiyini, BMT qərargahlarında və digər beynəlxalq tədbirlərdə 40-dan çox konfrans təşkil etdiyini, siyasi liderlər və beynəlxalq ekspertlər arasında dialoq yaratdığını bildirib.
O, həmçinin 2024-cü ildə Bakıda keçirilən Millətçi və Müstəqillik Hərəkatlarının Birinci Konqresində müstəmləkəçiliklə mübarizə aparan hərəkatların birləşməsini təmin edən Beynəlxalq Dekolonizasiya Cəbhəsinin yaradıldığını xatırladıb.
Abbas Abbasovun sözlərinə görə, BTQ tərəfindən hazırlanan hesabatlar BMT səviyyəsində dəstəklənir və təşkilat müstəmləkəçiliklə bağlı müxtəlif sahələrdə tədqiqat və analizlər aparır.
BTQ-nin əsas missiyası müstəmləkəçilikdən əziyyət çəkən xalqlara dəstək verməkdir və bu sahədə Azərbaycan regionda önəmli qlobal platforma rolunu oynayır.
