BAKI, AzerVoice, Azər Hüseynov Tarixçi, İstanbul Zaim Universitetinin Tarix və Mədəniyyət Bölümü Doktorantı, Qafqaz Etno-Sosial Araşdırmalar Mərkəzinin eksperti, xüsusi olaraq AzerVoice üçün
Quran ilə tanışlıq hər bir azərbaycanlı kimi məndə də Fatihə surəsi ilə oldu. Sovet hökuməti dağılanda menim 11 yaşım var idi. Siyasi şüuru olan bir valideynlərin yanında böyüdüyüm üçün Allahın lütfü ilə başım bir az yaşımdan azca qabağa getmişdi. Qismət olsa inşaallah Aztv-nin verilişini kasetdən köçürüb bir dəfə burada qoyacağam. On bir on iki yaşında siyasətdən falan söhbət edirdim. Əslində, ona görə bəlkə də pul para məsələsində qabağa gedə bilmədim. Balaca vaxtı kəndimizdə Şıxlıda da bir baba var idi, mənə a Reyqan deyirdi. Səbəb də o idi ki, böyüklərin oxuduğu qəzetlərin müzakirəsi zamanı yanlarında oturur, Amerikan imperializminin fəsadları haqqında fikir bildirirdim. Onda sovet dövlətini öz uşaq ağlımla ədalətli hesab edirdim. Amma sonra məlum oldu ki, sən demə elə işğal edənin yekəsi bu imiş.
Nə isə, qayıdaq mövzuya. 1991-ci ildə ilk dəfə Fatihə surəsini mən də əzbərlədim. Özü də divara vurulmuş dəmir işləməli bir lövhədən. Amma təbii ki, Quran ilə ilk tanışlıq namaz qılmağa başlayanda oldu. İlk əvvəl Quranın ilk tərcüməsi mənə bir az ağır gəldi. Mən Quranı namazın içində sevdim. Elə anladım. Xüsusi ilə ayətul kürsü mənim üçün çox sevimli oldu:
اللّٰهُ لَا إِلٰهَ إِلَّا هُوَ الْحَيُّ الْقَيُّومُ ۚ
لَا تَأْخُذُهُ سِنَةٌ وَلَا نَوْمٌ ۚ
لَهُ مَا فِي السَّمَاوَاتِ وَمَا فِي الْاَرْضِ ۗ
مَنْ ذَا الَّذِي يَشْفَعُ عِنْدَهُ اِلَّا بِاِذْنِه۪ ۚ
يَعْلَمُ مَا بَيْنَ اَيْد۪يهِمْ وَمَا خَلْفَهُمْ ۚ
وَلَا يُح۪يطُونَ بِشَيْءٍ مِنْ عِلْمِه۪ اِلَّا بِمَا شَاءَ ۚ
وَسِعَ كُرْسِيُّهُ السَّمَاوَاتِ وَالْاَرْضَ ۚ
وَلَا يَـُٔودُهُ حِفْظُهُمَا ۚ
وَهُوَ الْعَلِيُّ الْعَظِيمُ
Allah — Ondan başqa heç bir ilah yoxdur. O, həmişə diri olan, hər şeyi idarə edən və qaydaya salandır.
Onu nə yuxu tutur, nə də mürgü.
Göylərdə və yerdə nə varsa, hamısı Ona məxsusdur.
Onun izni olmadan heç kim Onun hüzurunda şəfaət edə bilməz.
O, insanların önlərində və arxalarında olanları bilir.
Onlar isə Onun elmindən yalnız O istədiyi qədərini qavraya bilərlər.
Onun kürsüsü göyləri və yeri əhatə etmişdir.
Onları qoruyub saxlamaq Ona ağır gəlməz.
O, uca və böyükdür.
