BAKI, AzerVoice
Paytaxt yollarında ötən il ərzində 2 546 yol-nəqliyyat hadisəsi baş verib. Qəzaların əsas səbəbləri sırasında yüksək sürət, sürücü diqqətsizliyi və yol hərəkəti qaydalarının pozulması üstünlük təşkil edir.
AzerVoice xəbər verir ki, bu barədə Daxili İşlər Nazirliyinin Nəqliyyatı İntellektual İdarəetmə Mərkəzi məlumat yayıb.
Bildirilib ki, paytaxtda quraşdırılmış videomüşahidə kameralarının əhatə dairəsində qeydə alınan hadisələrin təhlili göstərib: svetoforun qadağanedici işığında hərəkət, ara məsafəsinin saxlanılmaması, yol nişanlarının tələblərinə əməl edilməməsi və sürücü məsuliyyətsizliyi qəzaların əsas səbəbləridir.
Hadisələrin daha çox nəqliyyatın intensiv hərəkət etdiyi mərkəzi küçə və prospektlərdə - Ziya Bünyadov, Heydər Əliyev, Babək, 8 Noyabr və Tbilisi prospektlərində, həmçinin Bakı–Sumqayıt, Aeroport və Sabunçu–Zabrat şoselərində baş verdiyi qeyd olunub.
Məlumata görə, il ərzində 1 889 texniki nasaz nəqliyyat vasitəsinin yolda qalması süni nəqliyyat sıxlığının yaranmasına səbəb olub. Qəzalar və nasaz avtomobillərlə bağlı Nəqliyyatı İntellektual İdarəetmə Mərkəzi və Bakı şəhər Dövlət Yol Polisi İdarəsinin əməkdaşları tərəfindən operativ tədbirlər görülüb.
Bakıda nəqliyyat axınının intensivliyinin artırılması məqsədilə 60 küçə və prospekt üzrə svetoforlara il ərzində 73 min 717 dəfə “yaşıl dalğa” rejimi tətbiq edilib.
Bununla yanaşı, məlumat-sürət portalları vasitəsilə sürücülər yollardakı sıxlıq, təmir işləri, hava şəraiti və yol-nəqliyyat hadisələri barədə operativ şəkildə məlumatlandırılıb. Təhlükəsizliyin təmin olunması məqsədilə il ərzində hava şəraiti ilə əlaqədar sürət hədləri 63 dəfə endirilib.
