Suriyanın cənubunda yerləşən və əhalisinin əksəriyyətini dürzilər təşkil edən Suveyda əyalətində bazar ertəsi gecəsi daxili təhlükəsizlik qüvvələri ilə yerli silahlı qruplar arasında silahlı toqquşmalar baş verib. Rəsmi dövlət mediasının yaydığı məlumata görə, hadisələr nəticəsində təhlükəsizlik orqanlarının 10 əməkdaşı xəsarət alıb. Bu toqquşmalar Süveyda şəhərinin qərbində yerli silahlı dəstələrlə hökumət qüvvələri arasında baş verən və iki mülki şəxsin ölümü ilə nəticələnən qarşıdurmanın ertəsi günü qeydə alınıb. Bu barədə yerli təhlükəsizlik mənbələri "Agence France-Presse" (AFP) agentliyinə məlumat verib.
Suriyanın rəsmi televiziyası bildirib ki, qanundankənar qruplaşmaların Suveydanın qərb kəndlərindəki Təl Hədid ərazisində və Vəlğa istiqamətindəki məntəqələri hədəf alması nəticəsində yaralanan təhlükəsizlik qüvvələri əməkdaşlarının sayı 10-a yüksəlib. Dövlət televiziyası bundan əvvəl dörd əməkdaşın yaralandığını açıqlamışdı.
Suveyda şəhəri və cənub əyalətinin digər hissələri yerli silahlı qrupların nəzarətində qalmaqdadır. Bura 2024-cü ildə sabiq prezident Bəşər Əsədin devrilməsindən sonra bütün ölkə üzərində nəzarəti tam bərpa etməyə çalışan yeni Suriya hakimiyyətinin tabeçiliyindən kənarda qalan sonuncu ərazilərdən biridir.
Suriyanın milli birliyinin təmin edilməsi regional sülhün açarıdır
Həmin yerli dəstələr sırasında dürzi din xadimi Şeyx Hikmət əl-Hicriyə bağlı "Milli Qvardiya" (əl-Hərəs əl-Vətəni) qrupu da yer alır.
Qrup "Facebook" platformasında yaydığı bəyanatda hökumət qüvvələrini mülki şəxslərə zərər vurmaq məqsədilə şəhərin qərb istiqamətinə və müxtəlif hədəflərə mərmilər atmaqda ittiham edib və nəticədə bir uşağın yaralandığını bildirib.
Bəyanatda qeyd olunub: "Bu istiqamətdə yerləşən mövqelərimiz atəş nöqtələrinə qarşı müvafiq vasitələrlə cavab verir. Dağın təhlükəsizliyini və sakinlərinin salamatlığını təmin etmək naminə bu hücumlar cavabsız qalmayacaq".
Suveyda əyalətində 2025-ci ilin iyulunda da məzhəb zəminində qanlı zorakılıqlar yaşanmış və rəsmi istintaq komissiyasının sənədləşdirdiyi məlumatlara görə, həmin hadisələrdə ən azı 1760 nəfər həyatını itirmişdi.
