BAKI, AzerVoice
Monqolustanda türk tədqiqatçılar qədim köçəri kurqanlarını araşdırır - Bor Ovooda arxeoloji qazıntılar davam edir.
AzerVoice xəbər verir ki, İstanbul Universiteti və Monqolustan Milli Universitetinin birgə həyata keçirdiyi “Atlı Mədəniyyəti 2025” layihəsi çərçivəsində Monqolustanda qədim türklərin izlərini araşdırmaq üçün arxeoloji qazıntılara başlanılıb.
İyulun 3-dən etibarən başlayan qazıntılar İlteriş Fondu və layihənin əsas sponsoru olan “Kanca El Aletleri ve Dövme Çelik ve Makine Sanayi A.Ş.” tərəfindən dəstəklənir. Qazıntıların əsas məkanları Şövx-Uul və Bor Ovoo bölgələridir. Şövx-Uulda keçən ildən başlanan işlərin bu il yekunlaşdırılması planlaşdırılır.
Bor Ovooda isə tunc dövründən XIII əsrə qədər müxtəlif dövrlərə aid beş kurqanın üzərində qazıntılar aparılır. Kurqanların yerləşdiyi bu ərazi qədim türklər üçün müqəddəs sayılan Ötükən bölgəsinə daxildir. (Qeyd: "Bor" sözü boz, "ovoo" isə müqəddəs daş mənasını verir)
Qazıntılara Türkiyədən professor Kürşat Yıldırım, dosent Elvin Yıldırım, Dr. Ferhat Çiftçi və fəlsəfə doktoru Şeyma Sapma, Monqolustandan isə dosent Ulziyibayar Sodnom, professor Erdene Myagmar və tədqiqatçı Cenguun Ganbold rəhbərlik edir. Ümumilikdə 20-yə yaxın mütəxəssis bu işlərdə iştirak edir.
Bor Ovooda qazıntı işlərinə kurqanların səthinin təmizlənməsi ilə başlanılıb. Daha sonra kurqanlar açılacaq, dəfnlərin memarlıq planları tərtib ediləcək, dron vasitəsilə foto və 3D skan işləri aparılacaq. Tapıntılar xüsusi laboratoriyalarda mühafizə ediləcək.
Qeyd edək ki, bu kurqanlar köçəri türk və monqol tayfalarının zadəgan təbəqəsinə aid dəfn abidələridir və qədim türklərin dəfn adətləri ilə yanaşı, memarlıq irsini də əks etdirir. Araşdırmalar nəticəsində əldə olunacaq məlumatlar elmi konfranslarda təqdim ediləcək.
