BAKI, AzerVoice
Türkiyənin xarici işlər naziri Hakan Fidan bildirib ki, ölkəsinin xarici siyasəti bölgədə sabitliyi təmin etmək prinsipi üzərində qurulub və bunun üçün bir neçə əsas şərt mövcuddur.
“Birincisi, müharibə və münaqişələri mümkün qədər sakitləşdirmək və ya dayandırmaq. İkincisi, iqtisadi əməkdaşlığı ədalətli şəkildə inkişaf etdirmək ki, hər kəs fayda götürsün. Üçüncüsü, əlaqələri və regional qurumları institusional səviyyədə möhkəmləndirmək lazımdır ki, onlar daha davamlı olsun,” – Fidan qeyd edib.
Nazir vurğulayıb ki, bu baxış Türkiyənin regiondakı fəaliyyətində və Türk dünyası ilə münasibətlərində aydın şəkildə əks olunur.
“Biz Türkiyənin regional gücünü, nüfuzunu və liderliyini bölgədə sabitliyi təmin etmək üçün istifadə edirik. Artıq qlobal münasibətlərdə rəqabət və hökmranlıq deyil, əməkdaşlıq və sabitliyə əsaslanan, daha insani və əxlaqi xarici siyasət kursunu izləyirik.”- deyə o qeyd edib.
Fidan bu fikirləri Qəbələdə keçirilən Türk Dövlətləri Təşkilatının Xarici İşlər Nazirləri Şurasının iclası çərçivəsində Azərbaycan mətbuatına açıqlamasında səsləndirib.
O bildirib ki, dünya dərin geostrateji dəyişikliklər yaşayır və bu proseslər Türk dünyasına da təsirsiz ötüşmür. Lakin Türk Dövlətləri Təşkilatının getdikcə daha çox institusional xarakter qazanması və koordinasiyalı fəaliyyət göstərməsi, üzv ölkələri böhranlara qarşı daha dözümlü edir.
Nazir qeyd edib ki, Türk dövlətlərinin iqtisadiyyatının, infrastrukturunun, texnologiyasının və müdafiə qabiliyyətlərinin inkişafı hər bir ölkəni gücləndirir:
“Hər bir güclü dövlət bir araya gəldikdə daha möhkəm struktur yaranır. Mövcud istiqamətdə irəliləməyə davam etsək, Allahın izni ilə, qlobal böhranlara qarşı daha dayanıqlı bir Türk dünyası formalaşacaq,” - Fidan vurğulayıb.
O, həmçinin Qəbələdə keçirilən sammitdə iştirakdan məmnunluğunu ifadə edərək Prezident İlham Əliyevə təşəkkür edib.
“Biz Bakıda çoxlu görüşlər keçirmişik, amma Türk dünyasının liderlərini bu qədər gözəl şəhərdə qarşılamaq və burada bir araya gətirmək həqiqətən təqdirəlayiq hadisədir.”-deyə o bildirib.
Türk dövlətlərinin özünü inkişaf etdirməsi mühüm əhəmiyyət daşıyır - Hakan Fidan
Türkiyənin xarici işlər naziri Hakan Fidan bildirib ki, ölkəsinin xarici siyasəti bölgədə sabitliyi təmin etmək prinsipi üzərində qurulub və bunun üçün bir neçə əsas şərt mövcuddur. “Birincisi, müharibə və münaqişələri mümkün qədər sakitləşdirmək və ya dayandırmaq. İkincisi, iqtisadi əməkdaşlığı ədalətli şəkildə inkişaf etdirmək ki, hər kəs fayda götürsün. Üçüncüsü, əlaqələri və regional qurumları institusional səviyyədə möhkəmləndirmək lazımdır ki, onlar daha davamlı olsun,” – Fidan qeyd edib.
