BAKI, AzerVoice
Türkiyənin xarici işlər naziri Hakan Fidan Rusiyaya rəsmi səfəri çərçivəsində bu gün Rusiya xarici işlər naziri Sergey Lavrovla görüş keçirəcək.
AzerVoice xəbər verir ki, iki ölkə arasında diplomatik münasibətlərin gündəliyində duran məsələlər, regional və beynəlxalq inkişaflar görüş zamanı müzakirə olunacaq.
Görüşün mətbuata açıq hissəsində çıxış edən Fidan, yenidən Moskvada olmaqdan və səmərəli proqramın bir hissəsi olmaqdan məmnunluq duyduğunu bildirib. O qeyd edib ki, dünən Rusiya prezidenti Vladimir Putin tərəfindən qəbul olunub və ona Prezident Rəcəb Tayyib Ərdoğanın səmimi salamlarını, xoş arzularını və mühüm mesajlarını çatdırmaq imkanı əldə edib.
Nazir Fidan bildirib ki, Türkiyə ilə Rusiya arasındakı münasibətlər prezidentlərin müəyyən etdiyi istiqamətdə sağlam şəkildə irəliləyir.
“Coğrafiyamızda gündəm çox sürətlə dəyişir. Belə bir şəraitdə Türkiyə-Rusiya arasında dərin tarixi köklərə əsaslanan əlaqələr bölgəmizdə sabitlik və təhlükəsizlik baxımından mühüm rol oynayır. Rusiyanın Ukrayna ilə birbaşa danışıqlar üçün İstanbul-u seçməsi bu əməkdaşlığın və ortaq anlayışın təzahürüdür” - deyə Fidan bildirib
Fidan həmçinin Lavrovla görüşdə iki ölkə arasında enerji, iqtisadiyyat və başda Orta Şərq və Afrika olmaqla regional məsələlərin də müzakirə olunacağını bildirib.
Rusiya xarici işlər naziri Sergey Lavrov da görüş zamanı Fidanın rəhbərlik etdiyi nümayəndə heyətini Moskvada salamlamaqdan məmnun olduğunu bildirib. O qeyd edib ki, iki ölkə arasındakı geniş gündəlik Prezident Putin və Prezident Ərdoğan tərəfindən müəyyənləşdirilir.
“Dünənki görüşdə ortaqlığımızın dərinləşdirilməsinə yönəlmiş qarşılıqlı əməkdaşlıq və nəticə əsaslı yanaşma bir daha təsdiqləndi. İkitərəfli əməkdaşlıq sahəsində mühüm planlarımız var. Xaricdən gələn qeyri-qanuni maneələrin aradan qaldırılmasına çalışırıq. Ticarət və investisiya sahəsində əməkdaşlığımız inkişaf edir və davam edəcək”- deyə Lavrov vurğulayıb.
Lavrov əlavə edib ki, həm ikitərəfli hədəflər, həm də Şimali Afrika və Orta Şərqdə vəziyyətin yaxşılaşdırılmasına yönəlmiş beynəlxalq təşəbbüslər də müzakirə olunacaq. O, həmçinin bildirib ki, Rusiya Prezidenti Putinin də vurğuladığı kimi, Türkiyənin Ukrayna ilə birbaşa danışıqların yenidən təşkilinə dəstək verməsi yüksək qiymətləndirilir.
