Nazir Gülər ABŞ-ın Ankaradakı səfirini qəbul edib

Türkiyə Milli Müdafiə naziri Yaşar Gülər ABŞ-ın Ankaradakı səfiri Tomas Cozef Barakı qəbul edib.

AzerVoice xəbər verir ki, Türkiyə Milli Müdafiə nazirliyin sosial media hesabında paylaşılıb.

Tomas Barak kimdir ?

Türkiyə və ABŞ-ın Suriyada əməkdaşlığı gücləndirmək qərarına gəldiyi toplantıda Barak da iştirak edib. Dövlət katibi Mark Rubio Baraka Suriyada yerli strukturlarla əlaqə qurmaq səlahiyyətinin verildiyini açıqlayıb. Bu, onun Suriya üzrə xüsusi nümayəndə təyin olunacağı ehtimalını artırıb.

28 aprel 1947-ci ildə Kaliforniyada anadan olan Tomas Cozef Barak Livan əsilli katolik bir ailədə böyüyüb. Hüquq təhsili alan Barak, daha sonra Vanderbilt Universitetində hüquq üzrə doktorantura dərəcəsi (JD) alıb. Erken yaşlardan sahibkarlıq ruhu ilə tanınan Barak, maliyyə və daşınmaz əmlak sahəsində uğurlu karyera qurub və qısa müddətdə ABŞ-ın ən nüfuzlu investorlarından birinə çevrilib.

1980-ci illərdən etibarən Barakın adı Donald Tramp ilə birgə hallanmağa başlayıb. Onların dostluğu əvvəlcə daşınmaz əmlak sektorunda əməkdaşlıqla başlayıb, daha sonra şəxsi və siyasi səviyyəyə yüksəlib. Barak, Trampın 2016-cı il prezident kampaniyasının əsas donoru və strateji məsləhətçisi olub. Həmin il keçirilən inauqurasiya mərasiminin təşkilat komitəsinə rəhbərlik edərək rekord məbləğdə maliyyə toplanmasında rol oynayıb.

Barakın siyasi fəaliyyəti zaman-zaman mübahisələrə səbəb olub. 2021-ci ildə o, ABŞ hökumətinə qeydiyyatsız lobbiçilik etmək və Birləşmiş Ərəb Əmirliklərinin Tramp administrasiyasına təsir göstərməkdə vasitəçi olmaq ittihamları ilə məhkəməyə verilib. Lakin 2022-ci ildə məhkəmə onu bütün ittihamlardan bəraət etdirib. Hərçənd bu hüquqi proses onun imicinə müəyyən mənfi təsir göstərmişdi.

1991-ci ildə Barak “Colony Capital” adlı investisiya şirkətini təsis edib. Şirkət otel şəbəkələri, daşınmaz əmlak və əyləncə sahəsində böyük sərmayələrlə tanınıb. Daha sonra bu şirkət “DigitalBridge Group” adını alaraq texnologiya və rəqəmsal infrastruktur sahəsinə yönəlib. 80 milyard dollardan artıq aktiv idarə edən bu nəhəng qurum Barakı dünya miqyasında tanınan maliyyə liderlərindən birinə çevirib.

2020-ci ildən etibarən Barak şirkətin rəhbərliyindən çəkilərək daha az fəal mövqe tutub.

Üç dəfə evlənən Tomas Barak altı uşaq atasıdır. Onun həyat hekayəsi ABŞ mediasında tez-tez “Amerika arzusunun gerçəkləşmiş siması” kimi təqdim olunur — immiqrant ailəsində doğulan, lakin qlobal siyasət və iqtisadiyyat səhnəsində nüfuz qazanan bir şəxsiyyət.

Barakın ABŞ-ın Suriyada xüsusi nümayəndəsi təyin olunması onun biznes təcrübəsi və regional tanışlıqları fonunda diplomatik çevikliyi və praqmatizmi önə çıxara bilər. Tramp administrasiyasına yaxınlığı və Yaxın Şərqdəki əlaqələri isə bu təyinatın sadəcə texniki deyil, siyasi məna da daşıdığını da göstərir.