BAKI, AzerVoice
Qədim sivilizasiyalara işıq salan bu tapıntılar arasında monumental məzarlar, tunc heykəllər, mozaikalar və batmış gəmi də yer alır.
AzerVoice xəbər verir ki, 2025-ci ilin əvvəlindən etibarən Türkiyədə müxtəlif bölgələrdə aparılan arxeoloji qazıntılar Anadolunun zəngin tarixini bir daha ortaya qoyub.
Mədəniyyət və Turizm Nazirliyinin həyata keçirdiyi "Gələcək üçün İrs Layihəsi" çərçivəsində tapılan əsərlər təkcə bədii deyil, həm də sosial və tarixi baxımdan dəyərli məlumatlar təqdim edir.
Aşağıda bu ilin ən diqqətçəkən 10 arxeoloji tapıntısı ilə tanış ola bilərsiniz:
1. Qordion: 2700 illik monumental qəbir
Ankarada yerləşən Qordion Antik Şəhərində eramızdan əvvəl 8-ci əsrə aid monumental tumulus (qəbir təpəsi) aşkar edilib. 60 metr diametrli və 8 metr hündürlüyündə olan bu qəbir Frigiya kralına və ya yüksək rütbəli idarəçiyə aid ola bilər. Qazıntılar zamanı tunc qazanlar, dəmir buxur ocaqları və digər qiymətli əşyalar tapılıb.
2. Aspendos: Roma dövrünə aid Hermes heykəli
Antalyada yerləşən Aspendos antik şəhərində mərmərdən hazırlanmış, Hermesə aid olduğu düşünülən bir heykəl parçalanmış halda tapılıb və sonradan bərpa olunub. Əsas atributları ilə tanınan bu əsər eramızın II–III əsrlərinə aiddir.
3. Perge: Eros və Afrodita heykəlləri
Qədim Perge şəhərindəki qazıntılar zamanı müxtəlif dövrlərə aid beş heykəl aşkar edilib. Delfin üzərində oturan Eros, bütöv Afrodita fiquru və qadın obrazları şəhərin heykəltəraşlıq ənənələrindən xəbər verir.
4. Assos: Mozaika və abidə məzar
2200 illik nəbati motivli mozaika və 1800 illik monumental türbə Çanaqqalada yerləşən Assos antik şəhərində üzə çıxarılıb. Ellinizm dövrünə aid bu əsərlər şəhərin ictimai və mədəni həyatını daha dərindən anlamağa imkan verir.
5. Hadrianopolis: Qədim strategiya oyunu daşları
Karabük vilayətində yerləşən Hadrianopolisdə 5-ci əsrə aid sümük oyun daşları tapılıb. Bu parçalar Roma hərbi hissələrinin burada mövcudluğu və əsgərlərin oynadığı strateji oyunlarla bağlı yeni bilgilər təqdim edir.
6. Milas: Heyvan təsvirli Roma mozaikaları
Muğlanın Milas bölgəsindəki Roma hamamının döşəməsində timsah, delfin, flaminqo və yılan balığı təsvirlərinin yer aldığı nadir mozaikalar aşkar edilib. Bu rəsmlər həmin dövr sənətinin və su mədəniyyətinin maraqlı nümunələridir.
7. Stratonikeia: 2000 illik sarkofaq
YUNESKO-nun Ümumdünya İrs Siyahısında yer alan Stratonikeiada çələnglərlə bəzədilmiş, Eros və öküz başlı motivlərlə işlənmiş 2000 illik sarkofaq tapılıb. Bu, şəhərin qədim dəfn mədəniyyətinə dair yeni məlumatlar verir.
8. Perqamon: “Mozaika Evi” tapıldı
İzmirin qədim Perqamon şəhərində tapılan və “Mozaika Evi” adlandırılan kompleksdə hovuz, mozaikalar və "dünyanın ən şirin uşağı" yazılı məzar daşı aşkar edilib. Binanın xristianlıq dövründə də istifadə edildiyi bildirilir.
9. Metropolis: Parçalanmış tunc heykəllər
İzmirin Torbalı rayonundakı Metropolisdə minlərlə tunc heykəl qalıqları tapılıb. Bu kəşf şəhərdə tunc sənətkarlığı və heykəltəraşlığın inkişaf etdiyini və təkrar emalın tətbiq olunduğunu sübut edir.
10. Adrasan: 2000 illik batmış gəmi
Antalyanın Adrasan sahillərindəki sualtı qazıntılar zamanı Son Ellinistik-Erkən Roma dövrünə aid batmış keramika yük gəmisi aşkar edilib. Bu nadir tapıntı qədim dövr dəniz ticarəti və keramika sənəti barədə yeni məlumatlar təqdim edir.
