BAKI, AzerVoice, Nailə Babazadə
Türkiyə Əməkdaşlıq və Koordinasiya Agentliyi (TİKA), İsrailin 7 oktyabr 2023-cü ildən etibarən hücumlarını davam etdirdiyi Qəzzayə humanitar yardım və ərzaq dəstəyi göstərməkdə davam edir.
AzerVoice xəbər verir ki, TİKA-dan əldə edilən məlumata görə, Qəzzayə hücumların başladığı 7 oktyabr 2023-cü ildən bu yana TİKA davam edən ərzaq böhranına qarşı təcili humanitar yardım fəaliyyəti həyata keçirir. Bu çərçivədə TİKA 16 min 500-dən çox ailəyə ərzaq paketi, 160 min porsiya isti yemək təqdim edib.
TİKA 3 mindən çox ailəyə çadır, yataq, yorğan və qış geyimləri yardımı göstərib, eyni zamanda Səhiyyə Nazirliyi və xəstəxanalara da çox sayda tibbi ləvazimat və dərman göndərib.
TİKA-nın illərdir Qəzzadə həyata keçirdiyi yardım layihələri çərçivəsində inşa olunan bəzi binalar İsrailin davam edən hücumları nəticəsində zərər görüb. Bu tikililər arasında inşasına 2011-ci ildə başlanılan və 2015-ci ildə tamamlanan Fələstin-Türkiyə Dostluq Xəstəxanası da var. 180 çarpayılıq xəstəxana, Fələstinin ən böyük və müasir tədris və tədqiqat xəstəxanası kimi tanınırdı.
Xəstəxananın avadanlıqları 2017-ci ilin sentyabrında tamamlanıb, birgə idarəetmə protokolu isə 2018-ci ildə Ankarada imzalanıb. 2020-ci ilin yanvarında COVID-19 pandemiyası səbəbilə karantin mərkəzi kimi fəaliyyətə başlayıb və 2021-ci ilin noyabrında xərçəng xəstələri üçün xəstəxana kimi istifadə olunmağa başlanıb. Lakin bu xəstəxana 21 martda İsrailin hücumu nəticəsində dağıdılıb.
İsrailin Qəzzaya 2014-cü ildə etdiyi hücumların ardından TİKA-nın dəstəyi ilə inşa edilən Qəzza Türk Mənzilləri 20 min kvadratmetrlik sahəni əhatə edir, 20 blok və 320 mənzildən ibarət idi.
TİKA-nın 2017-ci ildə Fələstin hökumətinə təhvil verdiyi bu mənzillərdə təxminən 2 min 250 nəfər yaşayırdı. Lakin 10 oktyabr 2023-cü ildən etibarən bu kompleks şiddətli hücumlara məruz qaldı və nəticədə əksəriyyəti uşaq olmaqla 20 nəfər həyatını itirdi. Bəzi bloklar tamamilə dağıldı, bəziləri isə ağır zərər gördü.
TİKA, Fələstin və Qəzzada həyata keçirdiyi təmiz su layihələri çərçivəsində 1 milyondan çox insana təmiz içməli su təmin edən 22 artezian quyusu açıb. Həmçinin 360 məktəbə və 600 min şagirdə təmiz su çatdırılması üçün 10 duzsuzlaşdırma qurğusu verib. Bundan əlavə, 90 min nəfərin su ehtiyacını ödəyə biləcək tutuma malik yağış sularının toplanması sistemi qurulub.
İnkişaf layihələri sahəsində də TİKA təhsil, səhiyyə, kənd təsərrüfatı, heyvandarlıq, su, sanitar qovşaqlar, enerji, istehsal, turizm və mədəniyyət sahələrində 200-dən çox layihəni həyata keçirib.
