BAKI, AzerVoice, Nailə Babazadə
İstanbul Böyük Şəhər Bələdiyyəsinə aid korrupsiya istintaqı çərçivəsində həbsdə olan Ekrem İmamoğlu’nun “saxta diplom” işi üzrə ilk məhkəmə prosesi başladı. İmamoğluna “zəncirvari rəsmi sənəddə saxtakarlıq” ittihamı ilə 8 il 9 aya qədər həbs istənir.
AzerVoice xəbər verir ki, İstanbul 59-cu Asliye Cinayət Məhkəməsi tərəfindən Silivridəki Marmara Qapalı Cəza İcrası Müəssisəsinin qarşısındakı zalda keçirilən məhkəməyə, başqa cinayətdən həbsdə olan Ekrem İmamoğlu və vəkilləri qatılıb.
Duruşmaya həmçinin CHP sədri Özgür Özel, İmamoğlunun həyat yoldaşı Dilek İmamoğlu və uşaqları, atası Hasan İmamoğlu, CHP Baş Katibi Selin Sayek Böke, CHP Qrup Başçısı vəzifəsini icra edən Gökhan Günaydın, CHP sədr müavinləri Gökan Zeybek, Meryem Gül Çiftci Binici, Gülşah Deniz Atalar, CHP millət vəkilləri Bülent Tezcan, Utku Çakırözer, Sibel Suiçmez, Ayça Taşkent, hakimin qərarı ilə vəzifəsindən azad edilmiş CHP İstanbul İl Sədri Özgür Çelik, İstanbul Böyük Şəhər Bələdiyyəsinin Başkan Vəkili Nuri Aslan, bəzi vilayət və rayon bələdiyyə başçıları ilə çoxlu sayda tamaşaçı da qatılıb.
Xatırladaq ki, Ekrem İmamoğlu, 2025-ci il martın 23-də vəzifəsindən uzaqlaşdırılıb və “cinayətkar təşkilata rəhbərlik etmək”, “rüşvət alma” və “tender saxtakarlığı” ittihamları ilə həbs edilib.
