BAKI,AzerVoice, Fərid Mikayılov
Türkiyənin yerli avtomobil markası TOGG, Münhendə keçiriləcək IAA Mobility Beynəlxalq Sərgisində T10X və T10F modellərini tanıdacaq.
AzerVoice xəbər verir ki, şirkətdən bildirilib ki, TOGG-un 29 sentyabrda Almaniyada ixracına başlanılacaq.
“Ən böyük və ən çətin bazara giririk. Əgər Almaniyada rəqabətə davam gətirə bilsək, digər ölkələrdə də uğur qazanacağımıza inanırıq”- deyə TOGG-un baş direktoru Gürcan Karakaş deyib.
Karakaş həmçinin bildirib ki, TOGG-un yeni modeli T10F bu gün Türkiyədə satışa təqdim olunacaq.
TOGG ixracata başlamazdan öncə EuroNCAP təhlükəsizlik testlərindən 5 ulduz qazanıb. Karakaş qeyd edib ki, şirkət artıq T8X modeli üzərində işə başlayıb və onu normal vaxtdan daha tez bazara çıxarmağı planlaşdırır.
TOGG rəhbərliyi Almaniyadan sonra Fransa və İtaliyada da satışa başlamağı hədəflədiklərini açıqlayıb.
“Doğru zamanda doğru yerdəyik. Rəqabətə hazırıq və qısa müddətdə geniş miqyaslı istehsala keçə biləcəyik”- deyə bildirilib.
TOGG İdarə Heyətinin sədri Fuat Tosyalı isə vurğulayıb ki, şirkətin Almaniyada 2021-ci ildən filialı var və ilk ixrac istiqaməti əvvəlcədən planlaşdırılmışdı.
“Biz yalnız avtomobil istehsal etmədik, elektromobilite ekosistemi yaratdıq. Hazırda 3 min əməkdaşımız və yüzlərlə yerli tədarükçümüz var”- deyə o bildirib.
