BAKI,AzerVoice, Fərid Mikayılov
Qəzzaya humanitar yardım çatdırmaq məqsədilə gedən yeni bir donanma İsrail ordusu tərəfindən dayandırılıb.
AzerVoice xəbər verir ki, donanmada Türkiyədən üç millət vəkili, Səadət Partiyası Bursa Millət vəkili Mehmet Atmaca, Hatay Millət vəkili Necmettin Çalışkan və Gələcək Partiyası Millət vəkili Sema Silkin Ün iştirak edib.
Mehmet Atmaca sosial şəbəkədə bildirib ki, “Əzm Donanmasında olan millət vəkillərimiz və digər aktivistlər, İsrail hərbçiləri tərəfindən zorla saxlanılıb və aparılıb.” Sema Silkin Ün isə X hesabından yayımladığı video mesajda qanunsuz şəkildə saxlanıldığını və Qəzzaya humanitar yardım çatdırmaq məqsədilə beynəlxalq sularda olduğunu vurğulayıb.
İsrail Xarici İşlər Nazirliyi ən az 145 aktivistin sahilə gətirildiyini və yaxın vaxtda ölkədən çıxarılacaqlarını açıqlayıb. Aktivistlər arasında millət vəkilləri, həkimlər və siyasətçilər də yer alır. Nazirlik əməliyyatı “qanuni dəniz blokadasını pozmağa yönəlmiş boşa çıxmış cəhd” kimi qiymətləndirib.
