BAKI, AzerVoice, Nailə Babazadə
Türkiyənin xarici işlər naziri Hakan Fidan ABŞ dövlət katibi Marko Rubio ilə telefon danışığı aparıb.
AzerVoice xəbər verir ki, Türkiyə Xarici İşlər Nazirliyindən verilən məlumata görə, danışıqlarda Qəzzada atəşkəsin davamlılığının təmin edilməsi və insani yardımların bölgəyə fasiləsiz şəkildə çatdırılması üçün atıla biləcək addımlar müzakirə olunub.
Tərəflər, həmçinin Şarm əl-Şeyxdə imzalanmış “Niyyət Bəyanatı”nın icrası ilə bağlı məsələləri də dəyərləndiriblər.
Telefon danışığı zamanı Suriya ilə bağlı son vəziyyət, İranın nüvə proqramı ətrafında aparılan danışıqlar, eləcə də Rusiya–Ukrayna müharibəsinin gedişatı barədə də fikir mübadiləsi aparılıb.
Məlum olduğu kimi, Ankara və Vaşinqton son aylarda Qəzzada davam edən humanitar böhran və bölgədə sabitliyin təmin olunması istiqamətində diplomatik təmaslarını intensivləşdirib.
