BAKI, AzerVoice, Nailə Babazadə
Türkiyə avtomobil sənayesində uzun müddətdir gözlənilən mühüm addım atılıb. Sermaye Bazarları Qurumu (SPK), TOFAŞ Türk Avtomobil Fabrikası A.Ş. ilə dünya avtomobil nəhəngi Stellantisin Türkiyədəki əməliyyatlarının birləşməsini rəsmi şəkildə təsdiqləyib.
AzerVoice xəbər verir ki, SPK-nın qərarı ilə TOFAŞ, Stellantis Türkiyə ilə birləşmə prosesini tamamlayacaq. Şirkət bu barədə rəsmi açıqlama yayıb.
Açıqlamada bildirilib ki, TOFAŞ-ın 100 faiz pay sahibi olduğu Stellantis Türkiyə ilə aparılan sadələşdirilmiş birləşmə prosesi SPK tərəfindən təsdiqlənib.
Eyni zamanda qeyd olunub ki, TOFAŞ Stellantis Türkiyənin bütün kapital və səs hüquqlarına malik olduğundan bu birləşmə şirkətin mövcud sərmayəsində hər hansı artıma səbəb olmayacaq.
Ekspertlər hesab edirlər ki, bu addım Türkiyənin avtomobil istehsalı və ixrac imkanlarını daha da gücləndirəcək və TOFAŞ-ın dünya bazarındakı mövqeyini möhkəmləndirəcək.
