BAKI,AzerVoice, Fərid Mikayılov

Türkiyədə "Onlayn mühitdə qanunsuz mərc, şans oyunları və qumarla mübarizə üzrə Fəaliyyət Planı (2025–2026)" adlı yeni sənəd rəsmi şəkildə qüvvəyə minib.

AzerVoice xəbər verir ki, Rəcəb Tayyib Ərdoğanın imzaladığı Sərəncam bu gün "Resmi Gazete"də dərc olunub.

Sərəncamda qeyd olunur ki, ailə bağlarını zədələyən, sosial münasibətləri zəiflədən və xüsusilə gəncləri hədəf alan qanunsuz mərc və qumar fəaliyyəti həm cəmiyyət üçün mənfi nəticələr doğurur, həm də qeyri-rəsmi iqtisadiyyatın genişlənməsinə və cinayət yolu ilə əldə edilən gəlirlərin leqallaşdırılmasına şərait yaradaraq ictimai təhlükəsizlik baxımından ciddi təhdid yaradır.

Sənəddə vurğulanır ki, sosial medianın geniş yayılması, rəqəmsal ödəniş sistemləri və kriptovalyutaların inkişafı qanunsuz mərc fəaliyyətlərini daha əlçatan edib və bu prosesə transsərhəd xarakter qazandırıb. Bu səbəbdən hüquqi, texniki və inzibati mexanizmlərin gücləndirilməsi vacib hesab olunur.

Sərəncamdan önəmli məqamlar:

Qanunsuz onlayn mərc və qumarla mübarizə dövlət təhlükəsizliyi, sosial mühitin qorunması və iqtisadi sabitlik üçün həyati əhəmiyyət daşıyır.

Sosial media və kripto aktivlər bu fəaliyyətlərin yayılmasını sürətləndirir.

Problemin beynəlxalq xarakter alması səbəbilə dövlət qurumları arasında koordinasiya genişləndiriləcək.

Maarifləndirmə işləri artırılacaq, texniki nəzarət sistemləri gücləndiriləcək.

Fəaliyyət planının icrasına Maliyyə Cinayətlərinin Araşdırılması Şurasının(MASAK) rəhbərlik edəcəyi bildirilib. Bütün dövlət qurumları prosesə dəstək verməyə və üzərlərinə düşən öhdəlikləri yerinə yetirməyə çağırılıb.

Ərdoğan sənəddə qeyd edib ki, fəaliyyət planının həyata keçirilməsi zamanı bütün dövlət qurumları lazımi köməyi göstərməli və prosesi prioritet olaraq qəbul etməlidir.