BAKI, AzerVoice, Nailə Babazadə
Gürcüstanın daxili işlər naziri Geka Geladze ölkəsinin ərazisində qəzaya uğrayan Türkiyə Silahlı Qüvvələrinə (TSK) məxsus hərbi yük təyyarəsi ilə bağlı beynəlxalq istintaq qrupu yaradıldığını və bu qrupda Türkiyə rəsmilərinin də yer aldığını bildirib.
AzerVoice xəbər verir ki, nazir Gürcüstanın Siqnaxi bölgəsində qəzaya uğrayan hərbi nəqliyyat təyyarəsi ilə bağlı jurnalistlərə açıqlama verərək, hadisədən dərin üzüntü duyduğunu və həlak olan türk hərbçilərin ailələrinə başsağlığı verib. O, bölgədə axtarış-xilasetmə işlərinin davam etdiyini də qeyd edib.
“Biz Türkiyə ilə sıx əməkdaşlıq edirik. Beynəlxalq istintaq qrupu yaradılıb və orada Türkiyədən mütəxəssislər də iştirak edir. Onlar bütün gecə hadisə yerində işləyib və istintaq prosesinə aktiv şəkildə qoşulublar,” – deyə Geladze vurğulayıb.
Nazir əlavə edib ki, istintaqın gedişi barədə ictimaiyyət mərhələlərlə məlumatlandırılacaq.
Geladze qəzanın səbəbi ilə bağlı hələlik rəsmi qiymətləndirmə üçün vaxtın tez olduğunu deyib.
“Təyyarənin hissələri geniş əraziyə səpələnib. Buna görə Gürcüstan Silahlı Qüvvələri də prosesə cəlb olunub, çünki bu mərhələdə insan resursu çox vacibdir.”
O, həmçinin Gürcüstanın müdafiə naziri İrakli Çikovaninin də hadisə yerinə gedərək xilasetmə işlərini şəxsən izlədiyini bildirib.
Xatırladaq ki, Türkiyə Müdafiə Nazirliyi dünən açıqlama yayaraq, Azərbaycan’dan Türkiyəyə uçan C-130 tipli hərbi yük təyyarəsinin Gürcüstan–Azərbaycan sərhədi yaxınlığında qəzaya uğradığını bildirmişdi. Qəza nəticəsində təyyarədə olan 20 hərbçinin şəhid olduğu açıqlanıb.
