BAKI,AzerVoice, Fərid Mikayılov
Türkiyənin Milli Müdafiə Naziri Yaşar Gülər İsrail və Yunanıstanın Türkiyəyə F‑35 döyüş təyyarələrinin verilməməsi üçün lobbiçilik fəaliyyəti apardığını bildirib.
AzerVoice xəbər verir ki, nazir vurğulayıb ki, Ankara və Vaşinqton bu məsələləri qarşılıqlı şəkildə həll edəcək.
“F‑16 tədarükü ilə bağlı problem görmürük. Bizim əsas prioritetimiz F‑35-lərdir. İsrail və Yunanıstanın bu təyyarələrin bizə verilməməsi üçün lobbiçilik etdiyini bilirik. Türkiyə və ABŞ bu problemləri həll edəcək,” – deyə Gülər açıqlayıb.
Güler bildirib ki, Türkiyə Böyük Britaniya ilə bağladığı razılaşma çərçivəsində 20 yeni Eurofighter döyüş təyyarəsi alacaq. Təyyarələrin tədarük planı belədir:
- 2030: 6 təyyarə
- 2031: 8 təyyarə
- 2032: 6 təyyarə
Bundan əlavə, Qətər və Oman ilə Eurofighter tədarükü üzrə danışıqlar müsbət istiqamətdə davam edir. Qətərdən alınacaq təyyarələr az uçuş saatına malik hazır təyyarələrdir. Oman variantları isə AESA radarları, METEOR raketləri və modern avionika sistemləri ilə təchiz ediləcək. Modernizasiya işlərinin 12 təyyarə üçün 2028-ci ildə tamamlanması planlaşdırılır.
Eurofighter təyyarələri METEOR raketləri ilə birlikdə alınacaq və platformalarda Türkiyənin milli proqram təminatı və silah sistemləri istifadə ediləcək. Gülər vurğulayıb ki, Türkiyə METEOR-dan daha inkişaf etmiş raket sistemi hazırlayacaq və istəsələr, onu digər ölkələrə də sata biləcək.
Nazir qeyd edib ki, ABŞ prezidenti Donald Tramp CAATSA sanksiyalarının ləğvi məsələsini Senata təqdim etmək üçün təşəbbüs göstərib və bu istiqamətdə işlər davam edir. Türkiyə də F‑35 proqramı və sanksiyaların ləğvi ilə bağlı işçi qrupları yaradıb. Gülər bildirib ki, proses yekunlaşdıqda ictimaiyyətə məlumat veriləcək.
Nazir Yunanıstan, İsrail və Cənubi Kipr Rum Administrasiyasının (GKRY) əməkdaşlığının Türkiyə üçün təhlükə yaratmadığını açıqlayıb.
“Biz də bir çox ölkə ilə anlaşmalar imzalayırıq, amma bunu hansısa ölkəyə qarşı etmirik”- deyə o buldirib.
O, qeyri‑hərbi statuslu adalara İsraildən hava hücumundan müdafiə sistemlərinin yerləşdirilməsi xəbərlərinə də toxunaraq bunların beynəlxalq hüquqa zidd olduğunu qeyd edib.
Güler bildirib ki, Yunanıstan ordusunda ciddi kadr çatışmazlığı mövcuddur. Quru və Dəniz Qüvvələrinə müraciət edənlərin sayı azdır və son günlər hərbi aviasiya personalı arasında etirazlar baş verib.
