BAKI,AzerVoice,Fərid Mikayılov
Türkiyədə son bir həftə ərzində jandarma qüvvələri tərəfindən keçirilən əməliyyatlar çərçivəsində dələduzluq, sələmçilik və miqrant qaçaqmalçılığı ilə məşğul olan 7 ayrı mütəşəkkil cinayət qrupuna qarşı tədbirlər görülüb.
AzerVoice xəbər verir ki, Türkiyənin daxili işlər naziri Ali Yerlikaya sosial şəbəkə hesabında verdiyi açıqlamada bildirib ki, əməliyyatlar nəticəsində son 5 il ərzində hesablarında 251 milyon lirəlik maliyyə dövriyyəsi müəyyən edilən 67 şübhəli şəxs saxlanılıb.
Onlardan 42 nəfər barəsində həbs qətimkan tədbiri seçilib, 23 nəfər isə məhkəmənin qərarı ilə məhkəmə nəzarəti altına buraxılıb. Digər 2 şübhəli ilə bağlı istintaq tədbirləri davam etdirilir.
Nazirin sözlərinə görə, aparılan əməliyyatlar nəticəsində bu cinayət qruplarının oğurluq, dələduzluq və sələmçilik fəaliyyəti nəticəsində vətəndaşlara vurula biləcək ziyanın qarşısı alınıb.
Ali Yerlikaya qeyd edib ki, Respublika Baş Prokurorluqları və Jandarmanın Mütəşəkkil Cinayətkarlıqla Mübarizə Baş İdarəsinin koordinasiyası ilə həyata keçirilən əməliyyatlar zamanı bir sıra vilayətlərdə cinayət əməlləri ifşa olunub.
Belə ki, Denizli şəhərində 30-dan çox obyektə qarşı mütəşəkkil şəkildə oğurluq hallarının törədildiyi, Yalovada ağır dələduzluq cinayətlərinin idarə edildiyi, İzmirdə transformator və elektrik ötürücü kabellərin oğurlandığı, Iğdırda miqrant qaçaqmalçılığı ilə məşğul olunduğu, Muğlada sələmçilik fəaliyyəti həyata keçirildiyi, Tekirdağ və Şanlıurfa vilayətlərində isə terror təşkilatları ilə əlaqə iddiası ilə vətəndaşlardan pul tələb edildiyi müəyyən edilib.
Əməliyyatlar zamanı çoxsaylı rəqəmsal daşıyıcılar, müxtəlif məbləğlərdə nağd pul və ziynet əşyaları müsadirə olunub. Saxlanılan şəxslər barəsində cinayət işi açılıb, istintaq tədbirləri davam etdirilir.
