BAKI, AzerVoice, Nailə Babazadə
Avropa İttifaqı (Aİ) Komissiyasının genişlənmə üzrə məsul üzvü Marta Kos sabah Türkiyəyə rəsmi səfər edəcək və Xarici İşlər naziri Hakan Fidan ilə görüşəcək.
AzerVoice xəbər verir ki, görüşdə nazir Fidanın Aİ-yə tam üzvlüyün Türkiyə üçün strateji hədəf olaraq qaldığını vurğulaması və birliyin Türkiyəyə qarşı qərəzsiz, ədalətli yanaşma nümayiş etdirməsinin vacibliyini diqqətə çatdırması gözlənilir. Türkiyə tərəfi ikitərəfli münasibətlərdəki mövcud tıxacların aradan qaldırılması üçün qurumsal və çoxşaxəli əməkdaşlıq çərçivəsinin yaradılmasını tələb edəcək.
Danışıqlarda əsas diqqət Gömrük İttifaqının yenilənməsi, viza sərbəstliyi dialoqunun tamamlanması və Türk vətəndaşları, xüsusilə yük maşını sürücüləri üçün Şengen vizası prosedurlarının asanlaşdırılmasına yönələcək. Həmçinin Avropa İnvestisiya Bankının Türkiyədəki fəaliyyətinin tam bərpası və miqrasiya sahəsində ədalətli məsuliyyət bölgüsü məsələləri qaldırılacaq.
Hakan Fidan Türkiyənin iştirakı olmadan Avropanın təhlükəsizlik arxitekturasının qurulmasının qeyri-mümkün olduğunu ifadə edərək, Rusiya-Ukrayna müharibəsi, Qəzza, Suriya, Liviya və İran kimi regional mövzularda koordinasiyanın əhəmiyyətini vurğulayacaq. Qeyd edək ki, tərəflər sonuncu dəfə 2025-ci ilin dekabrında Brüsseldə bir araya gəlmişdilər.
