BAKI, VOA, Nailə Babazadə
Türkiyə Milli Müdafiə Nazirliyi İran ərazisinə giriləcəyi barədə xəbərləri yalanlayıb.
VOA xəbər verir ki, Türkiyə Milli Müdafiə Nazirliyi (MSB) tərəfindən keçirilən həftəlik brifinqdə regional təhlükəsizlik və hərbi əməliyyatlarla bağlı yayılan dezinformasiyalara sərt cavab verilib.
Nazirlik bəzi media resurslarında yer alan "ABŞ-ın mümkün müdaxiləsi zamanı Türkiyənin İran torpaqlarına girəcəyi" barədə xəbərləri qəti şəkildə yalanlayıb.
Rəsmi açıqlamada bildirilib ki, Türkiyə qonşu ölkələrdəki gərginliklərin hər zaman sülh və diplomatiya yolu ilə həllinin tərəfdarıdır. Sərhəd xəttində təhlükəsizlik tədbirləri yüksək səviyyədə və koordinasiyalı şəkildə davam etdirilsə də, İran ərazisinə hər hansı hərbi müdaxilə planlaşdırılmır.
Nazirlik həmçinin S-400 hava hücumundan müdafiə sistemlərinin Somaliyə göndəriləcəyi barədə iddiaları da təkzib edib. Vurgulanıb ki, bu sistemlər Türk Silahlı Qüvvələrinin inventarındadır və yalnız Türkiyənin əməliyyat ehtiyacları üçün hazır vəziyyətdə saxlanılır. MSB vətəndaşları yalnız rəsmi mənbələrə etibar etməyə və spekulyativ xəbərlərdən uzaq durmağa çağırıb.
