BAKI, VOA, Nailə Babazadə
Türkiyə Prezident Administrasiyasının Kommunikasiya İdarəsinin rəhbəri Burhanəddin Duran Ankarada keçirilən "Media perspektivindən münaqişə bölgələrində Türkiyənin sülh rolu" panelində mühüm bəyanatlarla çıxış edib.
VOA xəbər verir ki, Duran Türkiyənin Suriya xalqının haqlı mübarizəsində hər zaman onların yanında olacağını və bölgədə sabitliyin bərpası üçün səylərini davam etdirəcəyini vurğulayıb.
İdarə rəhbəri Suriyada 2024-cü ilin dekabrında baş verən dəyişikliklərdən sonra yeni bir dövrün başladığını diqqətə çatdırıb. O, Suriyanın yenidən qurulması və sabitliyinin qorunmasının asan vəzifə olmadığını, bu prosesi sabote etmək istəyən terror qruplaşmaları və bəzi xarici aktörlərin mövcudluğunu qeyd edərək deyib:
"Türkiyə olaraq biz dünən olduğu kimi, bu gün də, gələcəkdə də suriyalı qardaşlarımızın haqlı mübarizəsinin yanında olacağıq. Suriya dövlətinin ərazi bütövlüyünə və suverenliyinə hörmət göstərəcək, bunun qorunmasına kömək edəcəyik."
Burhanəddin Duran həmçinin Türkiyənin Ukrayna-Rusiya müharibəsindəki vasitəçilik rolundan, "Taxıl dəhlizi" sazişindən və Qəzzada törədilən soyqırıma qarşı apardığı beynəlxalq mübarizədən danışıb. O, dezenformasiya ilə mübarizəni sülh diplomatiyasının ayrılmaz tərkib hissəsi adlandıraraq, həqiqətlərin üzərindəki blokadanın qaldırılmasının vacibliyini bildirib.
Tədbirin sonunda Burhanəddin Duran və Suriyanın İnformasiya naziri Həmzə Mustafa "Türkiyənin sülh rolu" adlı foto-sərgiyə baxış keçiriblər.
