BAKI, VOA, Orxan Qədirzadə
Yaxın Şərqdə artan gərginlik fonunda Türkiyə rəhbərliyi regionda münaqişənin daha da genişlənməməsi üçün diplomatik səylərin davam etdirildiyini bildirib.
VOA xəbər verir ki, Türkiyə prezidenti Rəcəb Tayyib Ərdoğan Nazirlər Kabinetinin iclasından sonra verdiyi açıqlamada İranı regionda gərginliyi artıracaq addımlardan çəkinməyə çağırıb.
Dövlət başçısı bildirib ki, Türkiyə hökuməti fevralın 28-dən etibarən bütün dövlət qurumları ilə birlikdə yüksək hazırlıq vəziyyətində fəaliyyət göstərir və regiondakı hadisələri yaxından izləyir.
Ərdoğan vurğulayıb ki, Türkiyənin əsas məqsədi ölkəni regionda baş verən münaqişənin təsirlərindən qorumaq və vətəndaşların təhlükəsizliyini təmin etməkdir. Onun sözlərinə görə, Ankara bölgədə gərginliyin daha da artmaması üçün diplomatik səylər göstərir və münaqişənin dialoq yolu ilə həllini dəstəkləyir.
Prezident qeyd edib ki, böhran başlayandan bəri Türkiyə rəhbərliyi intensiv diplomatik fəaliyyət həyata keçirir. Bu çərçivədə 16 dövlət rəhbəri ilə danışıqlar aparılıb, Türkiyənin xarici işlər naziri isə 50-dən çox telefon danışığı həyata keçirib. Eyni zamanda müdafiə və təhlükəsizlik strukturları da tərəfdaş ölkələrlə daimi əlaqə saxlayır.
Ərdoğan əlavə edib ki, Türkiyə böhranın iqtisadi təsirlərini minimuma endirmək üçün tədbirlər görür. Enerji qiymətlərində mümkün artımın vətəndaşlara təsirini azaltmaq məqsədilə müvəqqəti olaraq qiymət tənzimləmə mexanizmi tətbiq olunub.
Türkiyə prezidenti həmçinin ölkənin müdafiə və təhlükəsizlik tədbirlərinin gücləndirildiyini bildirib. Onun sözlərinə görə, F-16 qırıcı təyyarələri, erkən xəbərdarlıq və yanacaqdaşıyan təyyarələr vasitəsilə Türkiyənin hava məkanı fasiləsiz nəzarət altında saxlanılır.
Ərdoğan bildirib ki, martın 4-də İrandan buraxılan və İraq və Suriya üzərindən Türkiyəyə istiqamətlənən ballistik raket NATO sistemləri tərəfindən zərərsizləşdirilib və bundan sonra İran tərəfinə rəsmi xəbərdarlıq edilib.
Türkiyə prezidenti qeyd edib ki, bütün xəbərdarlıqlara baxmayaraq regionda provokativ addımlar davam edir və bu, iki ölkə arasında uzun illərə dayanan qonşuluq münasibətlərinə zərər vura bilər.
O vurğulayıb ki, Türkiyə regionda daha çox qan tökülməsinin qarşısını almaq üçün səylərini davam etdirəcək və təhlükəsizliyin təmin olunması məqsədilə NATO və digər müttəfiqlərlə koordinasiyalı fəaliyyət göstərəcək.
