BAKI,VOA, Fərid Mikayılov
Türkiyənin İstanbul şəhərində terror təşkilatı İŞİD-ə qarşı genişmiqyaslı əməliyyat keçirilib.
VOA xəbər verir ki, İstanbul Respublika Prokurorluğunun koordinasiyası ilə İstanbul Polis İdarəsinin Terrorla Mübarizə və Kəşfiyyat şöbələri tərəfindən terror təşkilatı İŞİD-ə qarşı əməliyyat təşkil olunub.
Əməliyyat zamanı sosial şəbəkələr vasitəsilə terror təşkilatının təbliğatını aparan şəxslərə qarşı tədbirlər görülüb.
Hüquq-mühafizə orqanlarının keçirdiyi əməliyyat nəticəsində 13 şübhəli şəxs saxlanılıb.
Bildirilib ki, saxlanılan şəxslərin terror təşkilatı ilə əlaqələrinin və sosial media üzərindən aparılan təbliğat fəaliyyətlərinin araşdırılması istiqamətində istintaq tədbirləri davam etdirilir.
