BAKI, VOA, Nailə Babazadə
Türkiyə Milli Müdafiə Nazirliyi (MSB), ölkənin hava sahəsinin mühafizəsinə dəstək məqsədilə ayrılmış "Patriot" hava hücumundan müdafiə sisteminin Malatya şəhərində yerləşdirildiyini elan edib.
VOA xəbər verir ki, Türkiyə Milli Müdafiə Nazirliyindən verilən rəsmi bəyanatda bildirilir ki, Türk Silahlı Qüvvələri ölkənin və vətəndaşların təhlükəsizliyini təmin etmək məsələsində tam qərarlıdır. Bölgədə baş verən son hadisələr fonunda sərhədlərin və hava sahəsinin təhlükəsizliyi üçün zəruri tədbirlərin görüldüyü, həmçinin NATO və müttəfiqlərlə məsləhətləşmələrin aparıldığı vurğulanıb.
Nazirlik milli səviyyədə görülən işlərlə yanaşı, NATO tərəfindən də hava və raketdən müdafiə tədbirlərinin artırıldığını qeyd edib.
"Bu çərçivədə, hava sahamızın qorunmasına dəstək vermək üçün təyin olunmuş bir 'Patriot' sistemi Malatyada yerləşdirilir." - deyə qeyd edib.
Bəyanatın sonunda Türkiyənin müdafiə və təhlükəsizlik potensialını ən yüksək səviyyədə saxladığı, NATO və müttəfiqlərlə əməkdaşlıq şəraitində hadisələri qiymətləndirməyə davam edəcəyi bildirilib. Qeyd olunub ki, ölkə regional sülh və sabitliyin qorunması üçün səylərini əsirgəməyəcək.
