BAKI,VOA, Orxan Qədirzadə
Məşhur türkiyəli aktyor Görkem Sevindiyin fələstinli məhbuslarla bağlı paylaşımı İsrailin milli təhlükəsizlik naziri İtamar Ben-Qvirin sərt reaksiyasına səbəb olub.
VOA xəbər verir ki, İsrailin milli təhlükəsizlik naziri İtamar Ben-Qvir, "Eşref Rüya" serialında canlandırdığı "Kadir baba" obrazı ilə İsraildə böyük populyarlıq qazanan aktyor Görkem Sevindiyi hədəf alıb. Nazir sosial şəbəkələrdə yayılan video müraciətində aktyora xitabən: "Bəlkə sən türk serialında yaşayırsan, amma biz burada, İsraildə yaşayırıq. Terrorçular üçün ölüm", – deyə bildirib.
Gərginliyə səbəb türkiyəli aktyorun İsrail Knessetində fələstinli məhbusların edam edilməsinə icazə verən qanun layihəsinin qəbulunu tənqid edən paylaşımı olub. Sözügedən qanun 48 əleyhinə, 62 lehinə səslə qəbul edilib. Ben-Qvirin bu çıxışından sonra İsraildə aktyorun iştirak etdiyi layihələrin boykot edilməsi çağırışları başlayıb. Hazırda İsrail həbsxanalarında 350-si uşaq, 73-ü qadın olmaqla, 9600-dən çox fələstinli məhbusun olduğu bildirilir.
Görkem Sevindik yerli mediaya verdiyi açıqlamada paylaşımının tamamilə "insani bir reaksiya" olduğunu vurğulayıb. O, edam qərarı ilə bağlı xəbərlərin onu dərindən sarsıtdığını qeyd edərək: "Mən harada olursa-olsun, zülmə qarşıyam və bunun qarşısını almaq üçün əlimdən gələni etməyə hazıram", – deyib. Aktyor boykot çağırışlarının onun üçün heç bir əhəmiyyət kəsb etmədiyini də əlavə edib.
Qeyd edək ki, bu, Ben-Qvirin məşhur simalara qarşı ilk hücumu deyil. O, bundan əvvəl məşhur mərakeşli futbolçu Hakim Ziyeşi də Fələstinə dəstək verdiyi üçün bənzər şəkildə hədəf almışdı.
