BAKI,VOA, Nailə Babazadə
Türkiyə Prezidenti Administrasiyasının Kommunikasiya İdarəsinin məlumatına əsasən, Prezident Rəcəb Tayyib Ərdoğan və Pakistanın Baş naziri Şahbaz Şərif arasında regionun gələcəyi üçün böyük əhəmiyyət kəsb edən telefon danışığı baş tutub. Liderlər İranla bağlı əldə olunmuş atəşkəs prosesini və son beynəlxalq hadisələri ətraflı müzakirə ediblər.
VOA xəbər verir ki, prezident Ərdoğan atəşkəs prosesində oynadığı mühüm vasitəçilik roluna görə Pakistanın Baş naziri Şahbaz Şərifə xüsusi təşəkkürünü bildirib. O, iki həftəlik bu "sülh fürsəti"nin regionda qalıcı sabitliyin bərqərar olması üçün çox səmərəli qiymətləndirilməli olduğunu vurğulayıb. Türkiyə lideri rəsmi Ankaranın kalıcı sülhün təmin edilməsi istiqamətində bütün səyləri dəstəkləməyə və öz töhfəsini verməyə davam edəcəyini qeyd edib.
Öz növbəsində, Baş nazir Şahbaz Şərif də Prezident Ərdoğana Türkiyənin bu kritik diplomatik prosesdəki qətiyyətli mövqeyi və göstərdiyi dəstəyə görə minnətdarlığını ifadə edib. Hər iki lider regionda qan tökülməsinin dayandırılması və sülhün qalıcı xarakter alması üçün Türkiyə və Pakistanın birgə səylərini artırmaq barədə həmfikir olduqlarını bəyan ediblər.
