BAKI,VOA, Nailə Babazadə

Türkiyə Daxili İşlər Nazirliyi Şanlıurfa və Kahramanmaraşda baş verən məktəb hücumlarından sonra ictimaiyyəti yanıltmağa yönəlmiş paylaşımlar edən, təhdid və aksiya çağırışları edən 127 nəfərin saxlanıldığını elan edib.

VOA xəbər verir ki, nazirliyin açıqlamasında hadisələrlə bağlı həyata keçirilən təhlükəsizlik tədbirləri çərçivəsində təxribat xarakterli 1115 internet ünvanına (URL) girişin məhdudlaşdırıldığı bildirilib.

Bundan əlavə, dezinformasiya yayan və vətəndaşlar arasında təşviş yaratmağa çalışan 174 şəxs müəyyən edilib və onlardan 127-si hüquq-mühafizə orqanları tərəfindən yaxalanıb. Saxlanılan şəxslər barəsində məhkəmə prosesləri davam edir. Nazirlik bəyanatında xalqın hüzurunu pozmağa və cəmiyyəti yanlış istiqamətə yönləndirməyə hədəfləyən bütün fəaliyyətlərə qarşı mübarizənin qətiyyətlə davam etdiriləcəyini vurğulayıb.