BAKI,VOA, Nailə Babazadə
Türkiyə Prezident Administrasiyasının Kommunikasiya İdarəsinin rəhbəri Burhanettin Duran sosial media hesabında Prezident Rəcəb Tayyib Ərdoğanın 5-ci Antalya Diplomasi Forumundakı çıxışı ilə bağlı mühüm paylaşım edib.
VOA xəbər verir ki, Duran, Türkiyənin böhranların həllində qurucu rol üstlənərək, ədalət və tarazlığı qorumaqla qlobal sülhə töhfə verməyə qətiyyətlə davam edəcəyini vurğulayıb.
Prezident Ərdoğanın forumdakı əhatəli çıxışında qlobal sülh, regional sabitlik və beynəlxalq əməkdaşlıq naminə güclü mesajlar verdiyini bildirən Duran, xüsusilə Qəzzadakı vəziyyətə diqqət çəkib. O qeyd edib ki, cənab Prezident Qəzzada yaşananları yalnız "humanitar faciə" kimi qiymətləndirməyin kifayət etmədiyini, oradakı soyqırımın mövcud beynəlxalq nizamın çatışmazlıqlarını və kimləri qoruduğunu açıq şəkildə ifşa etdiyini bildirib.
Regional proseslərə toxunan Duran, İsrailin təxribatları nəticəsində İranla yaşanan gərginlikdən sonra elan olunan atəşkəsin Türkiyə tərəfindən məmnuniyyətlə qarşılandığını və bunun daimi sülh üçün fürsətə çevrilməsinin vacibliyini qeyd edib. Eyni zamanda, Hörmüz boğazından ticarət yollarının təhlükəsizliyinə qədər strateji məsələlərdə diplomatiyanın yeganə çıxış yolu olduğu, Türkiyənin "İnkişaf Yolu" layihəsi ilə regional əməkdaşlığa hazır olduğu diqqətə çatdırılıb.
Ege və Şərqi Aralıq dənizi ilə bağlı məsələlərdə Türkiyə və Şimali Kipr Türk Cümhuriyyətini kənarda qoyan yanaşmaların qətiyyətlə rədd edildiyini bildirən Kommunikasiya İdarəsinin rəhbəri, Yunanıstanla yaranan müsbət atmosferin Qərbi Frakiya türk azlığının hüquqlarına da müsbət təsir etməli olduğunu ifadə edib. Ukraynadakı müharibə ilə bağlı isə ədalətli və əhatəli bir müzakirə prosesinin həll üçün yeganə yol olduğu bir daha təkrarlanıb.
Sonda Burhanettin Duran, Prezident Rəcəb Tayyib Ərdoğanın himayəsi və Xarici İşlər Nazirliyinin ev sahibliyi ilə təşkil olunan bu mühüm forumun qlobal sabitliyə töhfə verməyə davam edəcəyinə inandığını bildirərək, əməyi keçən hər kəsə təşəkkürünü ifadə edib.
