BAKI,VOA, Fərid Mikayılov
NATO Baş katibi Mark Rutte Ankaraya səfəri çərçivəsində Türkiyənin aparıcı müdafiə sənayesi şirkətlərindən biri olan ASELSAN-ı ziyarət edib.
VOA xəbər verir ki, Mark Rutte şirkətin müasir istehsal və texnoloji imkanları ilə tanış olub, mühəndislərlə görüş keçirib.
O, Türkiyənin son illərdə müdafiə sənayesində əldə etdiyi nailiyyətləri “qlobal miqyasda uğur hekayəsi” kimi qiymətləndirib.
Məlumata görə, Rutte ASELSAN-da Haluk Görgün və Ahmet Akyol tərəfindən qarşılanıb. NATO rəhbəri çıxışı zamanı bildirib ki, müasir dövrdə yalnız müdafiə xərclərinin artırılması kifayət etmir, əsas məsələ istehsal gücünün genişləndirilməsidir.
Onun sözlərinə görə, Türkiyənin müdafiə sənayesi modeli NATO üçün mühüm nümunə rolunu oynayır. “Türkiyə bu sahədə real inqilab həyata keçirib və ASELSAN bu prosesin ön cəbhəsindədir”, – deyə o vurğulayıb.
Rutte həmçinin beynəlxalq təhlükəsizlik mühitinə toxunaraq bildirib ki, dünya Arktikadan Aralıq dənizinə, kosmosdan kiberməkana qədər geniş təhlükələrlə üz-üzədir. O, Rusiyanın Ukraynaya qarşı müharibəsinin davam etdiyini, Çinin hərbi potensialını artırdığını, İranın isə regionda sabitliyi pozan fəaliyyətlər həyata keçirdiyini qeyd edib.
NATO Baş katibi Türkiyənin bu təhdidləri birbaşa hiss edən müttəfiq olduğunu bildirərək alyansın ölkənin təhlükəsizliyini təmin etməkdə qətiyyətli olduğunu vurğulayıb.
O əlavə edib ki, kollektiv təhlükəsizliyin təmin olunması yalnız orduların deyil, həm də sənaye sektorunun üzərinə düşür. “Bizi təhlükəsiz edən təkcə maliyyə deyil, hava hücumundan müdafiə sistemləri, pilotsuz uçuş aparatları, sursat və radar texnologiyalarıdır”, – deyə Rutte qeyd edib.
ASELSAN-ın beynəlxalq layihələrinə də toxunan NATO rəhbəri şirkətin Polşa və Xorvatiya ilə əməkdaşlığını nümunə göstərərək “transatlantik istehsal əməkdaşlığı”nın gücləndirilməsinin vacibliyini vurğulayıb.
Rutte ASELSAN-ın gənc və dinamik kadr potensialını xüsusi qeyd edərək şirkətdə orta yaş həddinin aşağı olmasını yüksək qiymətləndirib və bunu gələcək təhlükəsizlik sistemlərinin inkişafı baxımından mühüm amil kimi dəyərləndirib.
